🔥ឃ្លានបាយខ្លាំងពេកហើយម្ដាយមិននៅ ក៏ដុតផ្ទះឆេះឈុល ផ្អើលអ្នកជិតខាងហៅសមត្ថកិច្ចអន្តរាគមន៍ជួយពន្លត់

ចែករំលែក៖

ខេត្តកំពង់ស្ពឺ៖ ផ្ទះ១ខ្នងធ្វើអំពីឈើដំបូលលប្រក់ក្បឿង ត្រូវភ្លើងឆេះបង្កឱ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចជួយអន្តរាគមន៍ពន្លត់ទាន់ពេល ខណៈដែលលោកកូនចិត្តភ្លើង ឃ្លានបាយខ្លាំងពេក ហើយខឹងនឹងឪពុកម្តាយមិននៅផ្ទះ ដោយទៅធ្វើការងារអស់ ក៏យកដែកកេះដុតផ្ទះផ្អើលឈុលតែម្តង។

ហេតុការណ៍កូនឃ្លានបាយខ្លាំងពេកគ្មានអីហូបដុតផ្ទះខ្លួនឯងភ្ញាក់ផ្អើល កាលពីវេលាម៉ោង០៤រសៀលថ្ងៃទី១១ ខែមិថុនា ឆ្នាំ២០២៥ ស្ថិតនៅក្នុងភូមិត្រពាំងត្រយឹង ឃុំពោធិចំរើន ស្រុកបសេដ្ឋ ខេត្តកំពង់ស្ពឺ ។

មន្ត្រីនគរបាលស្រុកបសេដ្ឋបានឱ្យដឹងថា ជនដៃដល់ជាកូនដុតផ្ទះដែលនគរបាលឃាត់ខ្លួនឈ្មោះ សាំង តុលា ភេទប្រុស អាយុ២៧ឆ្នាំមុខរបរមិនពិតប្រាកដ រស់នៅភូមិត្រពាំត្រយឹង ឃុំពោធិចំរើន ស្រុកបសេដ្ឋ បានយកដែកកេះពណ៌ក្រហម០១ដើម ធ្វើសកម្មភាពដុតផ្ទះរបស់ម្តាយមានឈ្មោះ កប បាន់ អាយុ៤៨ ឆ្នាំ រស់នៅភូមិ~ឃុំខាងលើ។

មន្ត្រីដដែលបន្តថា បានជាកូនបង្កើតដាច់ចិត្តដុតផ្ទះចោលនោះ គឺនៅពេលដែលជនសង្ស័យ(ឈ្មោះសាំង តុលា) នៅផ្ទះតែម្នាក់ឯង ហើយឪពុកអ្នកម្តាយចេញទៅធ្វើការងារនៅក្នុងរោងចិញ្ចឹមជ្រូកដូចសព្វដង បណ្តាលឱ្យឆេះផ្ទះទំហំ ៦ម៉ែត្រគុណនិង៧ម៉ែត្រ ធ្វើអំពីឈើដំបូលប្រក់ក្បឿង ឆេះអស់ប្រហែល២៥ភាគរយ និងឆេះសំភារៈប្រើប្រាស់ក្នុងផ្ទះមួយចំនួន សំណាងល្អបានប្រជាពលរដ្ឋ និងសមត្ថកិច្ចជួយអន្តរាគមន៍ពន្លត់ទាន់ពេល។

មន្ត្រីនគរបាលស្រុកបសេដ្ឋបញ្ជាក់ថា ក្រោយធ្វើសកម្ម ភាពដុតផ្ទះម្តាយខ្លួនឯងរួច ជនសង្ស័យដៃដល់ជាកូនបានរត់គេចខ្លួនបាត់តែម្តង។ ភ្លាមៗមានប្រជាពលរដ្ឋរាយការណ៍ទៅសមត្ថកិច្ចសុំឱ្យជួយអន្តរាគមន៍ បានទទួលព័ត៌មានខាងលើ កំលាំងជំនាញព្រហ្មទណ្ឌ និងជំនាញពន្លត់អគ្គីភ័យសហការជាមួយប៉ុស្តិ៍ពោធិចំរើន បានចុះដល់កន្លែងកើតហេតុធ្វើការអន្តរាគមន៍ជួយពន្លត់ទាន់ពេលវេលា។ លុះរហូតដល់វេលាម៉ោង០៥និង៣០នាទីល្ងាចថ្ងៃ ដដែល កំលាំងជំនាញព្រហ្មទណ្ឌ បានធ្វើការឃាត់ខ្លួនជនសង្ស័យដៃដល់ជាកូនបង្កហេតុ និងដកហូតវត្ថុតាងដែកកេះពណ៌ក្រហម០១ដើម យកមកសួរនាំនៅអធិការដ្ឋានស្រុកបសេដ្ឋផងដែរ។

បើតាមចម្លើយរបស់ជនសង្ស័យដៃដល់ជាកូន ឈ្មោះ សាំង តុលា បានបដិសេធថាខ្លួនមិនបានដុតផ្ទះនោះទេ ហើយបានឆ្លើយសារភាពថាខ្លួនបានបំផ្លិចបំផ្លាញបោកចាន វាយឆ្នាំង ពិតប្រាកដមែន ។ មូលហេតុដែលរូបគេធ្វើបែបនោះគឺ ដោយសារតែខឹងឪពុកម្តាយនិងបងប្អូនមិននៅផ្ទះ គ្មានម្ហូបអាហារហូប ហើយណាមួយដោយខ្លួនឃ្លានបាយខ្លាំងទៀតផង ។

...

មន្ត្រីនគរបាលស្រុកបសេដ្ឋបញ្ជាក់បន្ថែមថា ចំពោះជនសង្ស័យដៃដល់ឈ្មោះ សាំង តុលា នេះមានចរឹកកាចសាហាវធ្លាប់ប្រើប្រាស់គ្រឿងញៀន ហើយតែងតែវាយបំផ្លិចបំផ្លាញទ្រព្យសម្បត្តិក្នុងគ្រួសារ និងបង្ករការអុកឡុកក្នុងមូលដ្ឋានជាញឹកញាប់ណាស់៕