សហព័ន្ធបាល់ទាត់អ៊ីតាលី (FIGC) បាននិយាយកាលពីថ្ងៃអាទិត្យថា អតីតគ្រូបង្វឹក AC Milan និង Napoli លោក Gennaro Gattuso ត្រូវបានតែងតាំងជាគ្រូបង្វឹកក្រុមជម្រើសជាតិអ៊ីតាលី។

Gattuso នឹងជំនួសលោក Luciano Spalletti ដែលត្រូវបានបណ្តេញចេញកាលពីសប្តាហ៍មុនបន្ទាប់ពីការបរាជ័យយ៉ាងធ្ងន់ធ្ងរដោយប្រទេសន័រវេសក្នុងការប្រកួតជម្រុះ World Cup ។ 

អតីតខ្សែបម្រើរូបនេះនឹងត្រូវបានបង្ហាញជាផ្លូវការជាគ្រូបង្វឹកនៅថ្ងៃព្រហស្បតិ៍នៅឯសណ្ឋាគារ Parco dei Principi ទីក្រុងរ៉ូម។

ប្រធាន FIGC លោក Gabriele Gravina បាននិយាយនៅក្នុងសេចក្តីថ្លែងការណ៍មួយថា “Gattuso គឺជានិមិត្តរូបនៃបាល់ទាត់អ៊ីតាលី – អាវពណ៌ខៀវរបស់ជម្រើសជាតិគឺដូចជាស្បែកទីពីរសម្រាប់គាត់។ ការលើកទឹកចិត្តរបស់គាត់ ជំនាញវិជ្ជាជីវៈ និងបទពិសោធន៍របស់គាត់នឹងក្លាយជាមូលដ្ឋានគ្រឹះដើម្បីប្រឈមមុខនឹងការប្តេជ្ញាចិត្តរបស់ក្រុមជម្រើសជាតិនាពេលខាងមុខ” ។

គួររំលឹកថាលោក Spalletti បានចាកចេញបន្ទាប់ពីដឹកនាំរយៈពេល 2 ឆ្នាំដោយការប្រកួតចុងក្រោយរបស់គាត់ឈ្នះ 2-0 ទល់នឹង Moldova ប៉ុន្តែក្រុមរបស់គាត់ចាញ់ 3-0 ក្រោមថ្វីជើងន័រវេសក្នុងវគ្គជម្រុះ World Cup ។

លោកGattuso ដែលបានឈ្នះពានរង្វាន់ Coppa Italia ជាមួយ Napoli ក្នុងឆ្នាំ 2020 មានភារកិច្ចក្នុងការដឹកនាំជើងឯកពិភពលោក 4 សម័យអ៊ីតាលីទៅកាន់ World Cup ក្នុងកិច្ចសន្យារយៈពេលមួយឆ្នាំ នៅសហរដ្ឋអាមេរិក កាណាដា និងម៉ិកស៊ិក។

Gattuso បង្ហាញខ្លួនបាន 73 ប្រកួតសម្រាប់អ៊ីតាលី និងជាសមាជិកនៃក្រុមដែលឈ្នះពានរង្វាន់ World Cup ឆ្នាំ 2006 ។