ខេត្តក្រចេះ÷ យុវជនម្នាក់​បាន​ស្លាប់នៅក្នុងហេតុការណ៍អគ្គិភ័យឆេះផ្ទះប្រជាពលរដ្ឋមួយកន្លែងនៅភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ ដែលបានកើតឡើងនាវេលាម៉ោង ២១និង៤៥នាទីយប់ ថ្ងៃទី១៨ ខែមិថុនា ឆ្នាំ២០២៥។

ប្រភពពីសមត្ថកិច្ចបានឲ្យដឹងថា ម្ចាស់ផ្ទះមានឈ្មោះ ជីន ចាន់ថន ភេទប្រុស អាយុ ៣៩ ឆ្នាំ ជនជាតិខ្មែរ រស់នៅភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ។ ក្នុង​ហេតុការណ៍​បណ្តាល​ឲ្យ​ជនរងគ្រោះ​ឈ្មោះ រីន វ៉ាន់ថង ភេទប្រុស អាយុ ១៤ឆ្នាំ ត្រូវជាកូនប្រុសបង្កើត​ស្លាប់ ពេលកំពុងដេកនៅលើផ្ទះ។

ហេតុការណ៍អគ្គិភ័យឆេះផ្ទះខាងលើ បានបំផ្លាញទ្រព្យ សម្បត្តិនិងសម្ភារៈរួមមាន៖ ផ្ទះសាងសង់អំពីឈើជញ្ជាំងក្តារប្រក់ស័ង្កសី មានមានទំហំ ៧ ម៉ែត្រ × ៨ ម៉ែត្រ ម៉ូតូ ចំនួន ២ គ្រឿង ស្រូវ ឈើគ្រឿងផ្ទះមួយសម្រាប់ដែលដាក់នៅក្រោមផ្ទះ អង្ករ សម្លៀកបំពាក់ និងសម្ភារៈប្រើ ប្រាស់ត្រូវឆេះខូចខាតទាំងស្រុង សរុបជាទឹកប្រាក់ ប្រមាណ ចំនួន ១៥ ០០០ ដុល្លារ (មួយម៉ឺនប្រាំពាន់ដុល្លាអាមេរិក)។

ប្រភពដដែលបានបន្តឱ្យដឹងថា មូលហេតុដែលបង្កឱ្យកើតមានអគ្គិភ័យនេះឡើង គឺបណ្តាលមកពីឆ្លងចរន្តភ្លើងអគ្គិសនី។ នៅព្រឹកថ្ងៃទី១៩ ខែមិថុនា ឆ្នាំ២០២៥ ក្រុមគ្រួសារជនរងគ្រោះខាងលើ កំពុងរៀបចំធ្វើពិធីបុណ្យសពជូនកូនប្រុស ដែលរងគ្រោះថ្នាក់រហូតដល់បាត់បង់ជីវិតនៅក្នុងហេតុការណ៍ភ្លើងឆេះផ្ទះ កាលពីយប់ផងដែរ៕