អ្នកចាត់ការ Nuno Espirito Santo បានបន្តកិច្ចសន្យារបស់គាត់ជាមួយ Nottingham Forest រហូតដល់រដូវក្តៅឆ្នាំ 2028 បន្ទាប់ពីបានជួយក្លឹបចូលរួមការប្រកួតដណ្តើមពាននៅអឺរ៉ុបជាលើកដំបូងចាប់តាំងពីឆ្នាំ 1995-96។

លោក   Nuno មានសញ្ជាតិព័រទុយហ្គាល់ ដែលពីមុនបានគ្រប់គ្រង Wolverhampton Wanderers និង Tottenham Hotspur បានចូលមកដឹកនាំក្រុម Forest ក្នុងខែធ្នូ ឆ្នាំ 2023 និងបានជួយក្រុមឱ្យជៀសវាងការកាត់ចោល មុនពេលដឹកនាំពួកគេទៅកាន់ចំណាត់ថ្នាក់លេខ 7 ក្នុងឆ្នាំ 2024-25 ដែលជាយុទ្ធនាការកំពូលដ៏ល្អបំផុតរបស់ពួកគេក្នុងរយៈពេល 3 ទសវត្សរ៍។

Forest បានបាត់បង់កៅអីទៅលេងក្នុងក្របខណ្ឌ Champions League ខណៈដែលពួកគេបានបញ្ចប់ត្រឹមមួយពិន្ទុក្រោមក្រុម Newcastle United ដែលស្ថិតក្នុងចំណាត់ថ្នាក់លេខ 5 ដោយទទួលបានកៅអីមួយក្នុងវគ្គ Playoff របស់ Conference League ។ Nuno បាននិយាយនៅក្នុងសេចក្តីថ្លែងការណ៍មួយបន្ទាប់ពីចុះហត្ថលេខាលើកិច្ចសន្យាថ្មីរយៈពេល 3 ឆ្នាំថា “ខ្ញុំរីករាយដែលអាចបន្តដំណើររបស់យើងនៅក្លឹបបាល់ទាត់ដ៏អស្ចារ្យនេះ ។ យើងបានប្រឹងប្រែងយ៉ាងខ្លាំងដើម្បីបង្កើតចំណងពិសេសរវាងកីឡាករ អ្នកគាំទ្រ និងមនុស្សគ្រប់គ្នានៅក្នុងក្លឹប ដែលបានជួយយើងឱ្យសម្រេចបាននូវរឿងដ៏អស្ចារ្យកាលពីរដូវកាលមុន។ ឥឡូវនេះគឺជាពេលវេលាដែលត្រូវធ្វើការឱ្យខ្លាំងជាងពេលណាៗទាំងអស់ ខណៈដែលយើងខិតខំសម្រាប់ការចងចាំពិសេសៗបន្ថែមទៀតជាមួយគ្នា”។