ខេត្តព្រះវិហារ ៖ សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានគូសបញ្ជាក់ថា ពលករខ្មែរនៅប្រទេសថៃ អាចវិលប្រឡប់មកស្រុកកំណើតយើងបាន ខណៈពេលបច្ចុប្បន្ននេះ កម្ពុជា កំពុងខ្វះកម្លាំងពលកម្មជិត៣០ម៉ឺននាក់ដើម្បីផ្តល់ការងារធ្វើជូនប្រជាពលរដ្ឋខ្មែរ។

ក្នុងពិធីសំណេះសំណាលជាមួយ សមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ក្នុងខេត្តព្រះវិហារ នៅព្រឹកថ្ងៃទី២៧ ខែមិថុនា ឆ្នាំ២០២៥ សម្តេចតេជោ ហ៊ុន សែន បានថ្លែងថា កាលពីមុនអាជ្ញាធរថៃ បានរើសអើង និងចាត់ទុកពលករខ្មែរនៅថៃដូចជាចំណាប់ខ្មាំង ប៉ុន្តែពេលនេះ ក្រោយពីបានទទួលដំណឹងថា កម្ពុជាត្រៀមខ្លួន ដើម្បីទទួលយកពលករខ្មែរមកស្រុកកំណើតវិញ អាជ្ញាធរចាប់ផ្តើមផ្លាស់ប្តូរឥរិយាបថចំពោះពលករខ្មែរយើង។

សម្តេចតេជោ ហ៊ុន សែន ក៏បានគូសបញ្ជាក់ មានថៅកែរោងចក្រថៃ និងម្ចាស់កសិដ្ឋានថៃជាច្រើន បានប្រាប់ទៅអាជ្ញាធរថៃ កុំឱ្យធ្វើការប្រមាថមកលើពលករខ្មែរ ដែលអាចធ្វើឱ្យពលករខ្មែរវិលត្រឡប់ទៅស្រុកកំណើតវិញ ធ្វើឱ្យពួកគេបាត់បង់កម្លាំងការងាររបស់ពួកគេ ៕

ដោយ ៖ សិលា