ខេត្តកំពង់ស្ពឺ ៖ យុវជនចិត្តភ្លើងម្នាក់ ត្រូវបានកម្លាំងនគរបាលឃាត់ខ្លួន ក្រោយពីបានវាយបំផ្លិចបំផ្លាញសម្ភារៈនៅក្នុងផ្ទះ ហើយថែមទាំងគំរាមសម្លាប់លោក ឪពុកម្តាយថែមទៀត ព្រោះតែខឹងសុំលុយចំនួន៣ម៉ឺនរៀលមិនបាន ។ ការឃាត់ខ្លួនយុវជនវាយបំផ្លាញសម្ភារៈនេះបានធ្វើឡើងកាលពីវេលាម៉ោង៩ព្រឹកថ្ងៃទី៣០ ខែ មិថុនា ឆ្នាំ២០២៥ នៅក្នុងភូមិចំការវាល ឃុំក្រាំងអំពិល ស្រុកសំរោងទង ខេត្តកំពង់ស្ពឺ ។
មន្ត្រីនគរបាលស្រុកសំរោងទងបានឱ្យដឹងថា យុវជនដែលឃាត់បានមានឈ្មោះ ផុន សៀងហៃ អាយុ២៤ឆ្នាំ មុខរបរមិនពិតប្រាកដ រស់នៅជាមួយឪពុកម្តាយ ក្នុងភូមិចំការវាល ឃុំក្រាំងអំពិល ស្រុកសំរោងទង ខេត្តកំពង់ស្ពឺ ។
មន្ត្រីនគរបាលស្រុកសំរោងទងបានឱ្យដឹងទៀតថា បុរសជាឪពុកឈ្មោះ ពេជ វណ្ណៈ អាយុ៤៤ឆ្នាំ រស់នៅភូមិចំការវាល ឃុំក្រាំងអំពិល ស្រុកសំរោងទង ខេត្តកំពង់ស្ពឺ បានមកដាក់ពាក្យបណ្តឹងពីឈ្មោះ ផុន សៀងហៃ ភេទប្រុស អាយុ២៤ឆ្នាំ ត្រូវជាកូនបង្កើត ពីបទប្រើអំពើហិង្សាក្នុងគ្រួសារ ដោយវាយបំផ្លាញសម្ភារៈខ្ទេចខ្ទីអស់កាលពីវេលាម៉ោង១និង៥នាទីរសៀលថ្ងៃទី២៩ ខែមិថុនា ឆ្នាំ២០២៥ ដោយសារសុំលុយ ៣០.០០០រៀលមិនបាន ។ កូនប្រុសបានដាល់កញ្ចក់ទូដាក់សម្លៀកបំពាក់ បែកអស់មួយផ្ទាំង ព្រមទាំង បោកចាន បោកឆ្នាំង និងថែមទាំងគំរាមសម្លាប់ឪពុកម្តាយទៀតផង ។ ដោយអស់ទ្រាំនូវទង្វើរបស់កូនប្រុសមិនបានឪពុកបានដាក់ពាក្យប្តឹងតែម្តង ។
នគរបាលស្រុកសំរោងទងបញ្ជាក់ថា ក្រោយពីទទួលបានពាក្យបណ្តឹង លុះដល់ព្រឹកថ្ងៃទី៣០ ខែ មិថុនា ឆ្នាំ២០២៥ កម្លាំងជំនាញព្រហ្មទណ្ឌ ស្រុកសំរោងទង សហការជាមួយកម្លាំងប៉ុស្តិ៍នគរបាលរដ្ឋបាលឃុំ បានឃាត់ខ្លួនយុវជនជាកូនមកសាកសួរ ហើយបានឆ្លើយសារភាពថាពិតជាបានដាល់កញ្ចក់ទូ និងវាយបំផ្លាញ ថែមទាំងគំរាមសម្លាប់លោកឪពុកអ្នកម្តាយពិតប្រាកដមែន ខឹងសុំលុយចំនួន៣ម៉ឺនរៀលមិនបាន ។
បច្ចុប្បន្នយុវជនចិត្តស្លុយ នគរបាលជំនាញកំពុងសួរនាំ និងកសាងសំណុំរឿងដើម្បីចាត់ការបន្តតាមផ្លូវច្បាប់ ៕
