ខេត្តកំពង់ឆ្នាំង៖ បុរសអ្នកបើកបរគោយន្តម្នាក់បានស្លាប់ភ្លាមៗនៅនឹងកន្លែងកើតហេតុ ខណៈដែលគោយន្តកន្រ្តៃដឹកពីងពង់ ហើយក្រឡាប់ធ្លាក់ប្រឡាយសង្កត់បុរសជាអ្នកបើកបរ។

ហេតុការណ៍ក្រឡាប់គោយន្តនេះបានកើតឡើងនៅវេលាម៉ោង១១ និង៤៥នាទីថ្ងៃទី៣១ ខែសីហា ឆ្នាំ២០១៦ នៅតាមភូមិសាអង ឃុំប្រស្និប ស្រុករលាប្អៀរ ខេត្តកំពង់ឆ្នាំង ។

សមត្ថកិច្ចបានឲ្យដឹងថា ជនរងគ្រោះស្លាប់ក្នុងករណីក្រឡាប់គោយន្តនេះមានឈ្មោះ ថន ខា ភេទប្រុស អាយុ២៧ឆ្នាំ រស់នៅភូមិថ្លុកជ្រៅ ឃុំអញ្ជាញរូង ស្រុកបរិបូរណ៌ ខេត្តកំពង់ឆ្នាំង ។

ប្រជាពលរដ្ឋដែលឃើញហេតុការណ៍បានប្រាប់ឲ្យដឹងថា នៅមុនពេលកើតហេតុគោយន្តកន្រ្តៃមួយគ្រឿង ដឹកដើមពីពង់ពេញមួយគោយន្ត ដោយធ្វើដំណើរចេញភូមិសាអងក្នុងទិសដៅពីត្បូងទៅជើងតាមផ្លូវលំ ដែលមានស្ថានភាពពិបាក់ ពេលមកដល់ចំណុចកើតហេតុ ក៏ស្រាប់តែគោយន្តក្រឡាប់បះជើងឡើងលើ ធ្លាក់ចូលទៅប្រឡាយ ចំណែកឯជនរងគ្រោះដែលជាអ្នកបើកបរ បានខ្ទាតចូលស្នាមភ្លោះទឹកដក់ និង ត្រូវដើមពីពង់សង្កត់ពីលើ បណ្តាលឲ្យស្លាប់ភ្លាមៗនៅនឹងកន្លែងកើតហេតុតែម្តង ។

ក្រោយពេលកើតហេតុសមត្ថកិច្ចបានទំនាក់ទំនងទៅក្រុមគ្រួសារប្រគល់សពយកទៅធ្វើបុណ្យតាមប្រពៃណី៕

ដោយ៖ ចន្ថា