ទីក្រុងតូក្យូ៖ លោក Iwaya Takeshi រដ្ឋមន្រ្តីការបរទេសជប៉ុន នាថ្ងៃព្រហស្បតិ៍ ទី២៤ ខែកក្កដា ឆ្នាំ២០២៥នេះ បានចេញសេចក្តីថ្លែងការណ៍ថា រដ្ឋាភិបាលជប៉ុន មានការព្រួយបារម្ភជាខ្លាំង ជុំវិញការផ្ទុះជម្លោះយោធារវាងកម្ពុជានិងថៃនាថ្ងៃនេះ ខណៈកន្លងមក ទីក្រុងតូក្យូ បានព្យាយាមធ្វើការដើម្បីជំរុញឱ្យភាគីទាំងពីរ ព្យាយាមបន្ធូរបន្ថយសភាពការណ៍ ដែលចាប់ផ្តើមកើតភាពតានតឹង តាំងពីមានការប៉ះទង្គិច កាលពីថ្ងៃទី២៨ ខែឧសភាមក។ នេះបើតាមការបង្ហោះនៅលើវែបសាយ ក្រសួងការបរទេសជប៉ុន។
ជាចុងក្រោយលោករដ្ឋមន្រ្តីការបរទេសជប៉ុន បានសង្កត់ធ្ងន់ថា ការរក្សាទំនាក់ទំនងល្អរវាងកម្ពុជានិងថៃ គឺមានសារសំខាន់ជាខ្លាំង សម្រាប់សន្តិភាពនិងស្ថិរភាព នៅក្នុងតំបន់។
ដូច្នេះហើយជប៉ុនទទូចឱ្យទាំងកម្ពុជានិងថៃ ប្រកាន់ភាពអត់ធ្មត់ជាអតិបរមា ហើយជប៉ុនសង្ឃឹមជាខ្លាំងថា ភាពតានតឹងរវាងប្រទេសជិតខាងទាំងពីរ នឹងថយចុះទៅវិញដោយសន្តិវិធីតាមរយៈកិច្ចសន្ទនា៕ដោយ៖តារា
