កាសែត Laotian Times នៅថ្ងៃអង្គារ ទី២៩ ខែកក្កដា ឆ្នាំ ២០២៥ បានផ្សាយថា ព្យុះទីហ្វុង Wipha បានឆក់យកជីវិតមនុស្ស ៤នាក់ និង៤នាក់ទៀតបាត់ខ្លួន បន្ទាប់ពីបានបោកបក់លើ ៣៤ស្រុកនៃខេត្តមួយចំនួនរបស់ប្រទេសឡាវ។

ព្យុះបានប៉ះពាល់ដល់ប្រជាជនជិត១៥ ០០០គ្រួសារ ខូចខាតផ្ទះជាង ២២០០ខ្នង និងបង្កការបំផ្លិចបំផ្លាញខ្លាំង។ អ្នកស្លាប់ទាំងនោះរួមមានមនុស្សម្នាក់នៅខេត្ត Xieng Khouang និង៣នាក់នៅខេត្ត Luang Prabang ។ អាជ្ញាធរខេត្ត Houaphanh កំពុងបន្តស្វែងរកអ្នកបាត់ខ្លួន៤នាក់ ខណៈ៦នាក់ផ្សេងទៀតរងរបួស។
ព្យុះបានបំផ្លាញដីស្រែចម្ការជិត ២ ០០០ហិកតា កាត់ផ្តាច់បណ្តាញអគ្គិសនីមួយ និងប៉ះពាល់ដល់ហេដ្ឋារចនាសម្ព័ន្ធសំខាន់ៗ និងងាប់សត្វពាហនៈចំនួន ២៥ក្បាល។ រដ្ឋបាលខេត្តបានដាក់ពង្រាយក្រុមសង្គ្រោះដើម្បីជួយដល់ប្រជាជន៕ ដោយធីរីណា

រូបថត​: TTXVN