ភ្នំពេញ៖ លោកស្រីឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា បានថ្លែងថា នៅវេលាម៉ោង១១ព្រឹក ថ្ងៃទី ១ ខែសីហា ឆ្នាំ២០២៥ ភាគីថៃបានប្រគល់មកឱ្យកម្ពុជាវិញនូវកងកម្លាំងចំនួន ០២ រូបប៉ុណ្ណោះ ដូច្នេះកម្ពុជាបន្តជំរុញឱ្យភាគីថៃប្រគល់កងកម្លាំងរបស់យើងដែលនៅសេសសល់ដទៃទៀតឱ្យបានឆាប់រហ័ស ស្របតាមច្បាប់មនុស្សធម៌អន្តរជាតិ។
សូមជម្រាបជូនថា ទាហានកម្ពុជាទាំង២រូបដែលថៃបញ្ជូនមកកម្ពុជាវិញនៅថ្ងៃទី០១ ខែសីហានេះ មានដូចជា៖
-1-អនុ/ត្រី អាង អឿង ដែលមានស្មាតីមិនគ្រប់គ្រាន់។
-2-លោកព្រិន្ធបាលឯក ម៉ម រិទ្ធី ដែលរបួសបាក់ដៃ និងរបួសធំនៅត្រគាកខាងស្តាំ។
គួរជម្រាបជូនដែរថា ថ្លែងក្នុងសន្នីសីទសារព័ត៌មាន កាលពីព្រឹកថ្ងៃទី០១ ខែសីហានេះ លោកស្រីឧត្តមសេនីយ៍ឯក ម៉ាលី សុជាតា បានគូសបញ្ជាក់ថា «កម្ពុជាក៏បានស្នើឱ្យម៉ាឡេស៊ីដែលជាប្រធានអាស៊ានឱ្យជួយអន្តរាគមន៍ដើម្បីជំរុញឱ្យភាគីថៃឆាប់ប្រគល់ពួកគេឱ្យយើងវិញ។ ដូច្នេះក្រសួងការពារជាតិ កងយោធពខេមរភូមិន្ទ នឹងមិនទុកសមាជិករបស់ខ្លួនណាម្នាក់ចោលនោះទេ ទោះក្នុងកាលៈទេសៈណាក៏ដោយ»។ ខណៈកម្លាំងកម្ពុជាចំនួន២០រូប ដែលស្ថិតនៅក្រោមការគ្រប់គ្រងរបស់ថៃ ចាប់តាំងពីថ្ងៃ២៩ ខែកក្កដា ឆ្នាំ២០២៥មក ៕
ដោយ៖តារា
