ប្រទេសចិនបានធ្វើសកម្មភាពទប់ទល់គ្រោះជំនន់កម្រិតទី៤ ក្នុងខេត្តក្រុងចំនួន៥ ខណៈភ្លៀងធ្លាក់ខ្លាំងទៅៗត្រូវបានគេព្យាករថានឹងវាយប្រហារតំបន់ធំៗក្នុងប៉ុន្មានថ្ងៃខាងមុខនេះ។

ទីភ្នាក់ងារសារព័ត៌មាន Xinhua News បានរាយការណ៍ថា ចាប់ពីថ្ងៃទី 9 ដល់ថ្ងៃទី 11 ខែសីហា ភ្លៀងធ្លាក់ខ្លាំងគ្របដណ្តប់លើខេត្ត Henan, Hubei, Chongqing, Sichuan, Shaanxi, Anhui និង ខេត្តGansu ជាកន្លែងដែលត្រូវបានគេដាក់ឱ្យប្រុងប្រយ័ត្ន ដោយតំបន់ខ្លះទំនងជាមានភ្លៀងធ្លាក់ខ្លាំង។
ជំនន់ទឹកភ្លៀងនេះគំរាមកំហែងធ្វើឱ្យកម្រិតទឹកនៅតំបន់ខាងលើ និងកណ្តាលនៃទន្លេ Yangtze និង Huai កើនឡើងយ៉ាងឆាប់រហ័ស ខណៈដែលទន្លេតូចៗ និងមធ្យមជាច្រើននៅក្នុងតំបន់ដែលមានហានិភ័យខ្ពស់អាចលើសពីកម្រិតប្រកាសអាសន្ន។
កាលពីថ្ងៃទី៩ ខែសីហាក្រសួងធនធានទឹករបស់ប្រទេសចិនបានស្នើឱ្យអាជ្ញាធរមូលដ្ឋានពង្រឹងការតាមដានស្ថានភាពទឹកភ្លៀង និងកម្ពស់ទឹកទន្លេ ចេញការព្រមានទាន់ពេលវេលា រឹតបន្តឹងវិធានការបង្ការទឹកជំនន់ក្នុងទីក្រុង យកចិត្តទុកដាក់ជាពិសេសក្នុងការទប់ស្កាត់ហានិភ័យក្នុងទន្លេតូចៗ និងជម្លៀសប្រជាពលរដ្ឋនៅតំបន់គ្រោះថ្នាក់ឱ្យបានទាន់ពេលវេលា។
នៅថ្ងៃដដែល រដ្ឋបាលទូទៅនៃការគ្រប់គ្រងទឹកជំនន់ និងគ្រោះរាំងស្ងួតរបស់ប្រទេសចិនក៏បានដាក់ចេញនូវការឆ្លើយតបជាបន្ទាន់កម្រិត IV ផងដែរនៅក្នុងខេត្ត Jiangsu, Anhui, Hubei និង Chongqing ។ ក្រុមការងារត្រូវបានបញ្ជូនទៅ Anhui និង Hubei ដើម្បីជួយដឹកនាំការងារបង្ការទឹកជំនន់។

នៅល្ងាចថ្ងៃទី 9 ខែសីហា ក្រសួងធនធានទឹកនិងរដ្ឋបាលឧតុនិយមចិនបានចេញសេចក្តីជូនដំណឹងពណ៌ទឹកក្រូច (កម្រិតទី 2) សម្រាប់ទឹកជំនន់ភ្លាមៗនៅតំបន់មួយចំនួននៃខេត្ត Henan, Hubei និង Sichuan ហើយបានព្រមានអំពីហានិភ័យស្រដៀងគ្នានេះនៅក្នុងតំបន់ផ្សេងទៀតដោយសារតែភ្លៀងធ្លាក់ខ្លាំងអូសបន្លាយ។ ប្រទេសចិនមានប្រព័ន្ធព្រមានអាកាសធាតុកម្រិតបួន ដោយពណ៌ក្រហមគឺធ្ងន់ធ្ងរបំផុតតាមពីក្រោយដោយពណ៌ទឹកក្រូច លឿង និងខៀវ។
វិធានការនេះកើតឡើងបន្ទាប់ពីមានភ្លៀងធ្លាក់ខ្លាំងចាប់តាំងពីថ្ងៃទី 8 ខែសីហាបានបណ្តាលឱ្យមានទឹកជំនន់ភ្លាមៗនៅក្នុងខេត្ត Gansu ដោយបានសម្លាប់មនុស្ស 10 នាក់និង 33 នាក់បាត់ខ្លួន៕ ដោយធីរីណា

រូបថត​: xinhua