លោកPETR CECHអតីតអ្នកចាំទីអន្តរជាតិឆេក បានប្រកាសថាលោកបានចែកផ្លូវពីភរិយាក្រោយរួមរស់ជាមួយគ្នាអស់ ២៦ ឆ្នាំ។

វីរបុរសក្រុមតោខៀវ Chelsea បានបង្ហាញព័ត៌មានដ៏សោកសៅនៅលើប្រព័ន្ធផ្សព្វផ្សាយសង្គមជាមួយនឹងសំណេរខ្លីមួយ។

លោកCech អាយុ 43 ឆ្នាំបាននៅជាមួយលោកស្រី Martina តាំងពីគាត់នៅក្មេងហើយពេញមួយអាជីពលេងបាល់ទាត់របស់គាត់។

ប្តីប្រពន្ធនេះមានកូនពីរនាក់ជាមួយគ្នាគឺ Damian Cech អាយុ 16 ឆ្នាំ និង Adela Cechova អាយុ 17 ឆ្នាំ។ អ្នកចាំទីចូលនិវត្តន៍រូបនេះបានបង្ហោះនៅលើ Instagram ដោយបញ្ជាក់ថាពួកគេបានសម្រេចចិត្តបញ្ចប់អាពាហ៍ពិពាហ៍របស់ពួកគេ។ ទោះជាយ៉ាងណា លោកបានផ្តល់យោបល់ថាពួកគេនៅតែជា “មិត្តល្អ”។

គាត់បានចែករំលែករូបភាពសខ្មៅរបស់គាត់ជាមួយ Martina ថើបគាត់នៅលើថ្ពាល់។ គាត់បានសរសេរថា “Martina និងខ្លួនខ្ញុំមានការសោកសៅក្នុងការប្រកាសថាយើងបែកគ្នាបន្ទាប់ពី 26 ឆ្នាំជាមួយគ្នា។ យើងនៅតែជាមិត្តល្អបំផុត និងមានមោទនភាពយ៉ាងខ្លាំងចំពោះកូនទាំងពីររបស់យើង”។

ពួកគេបានជួបគ្នានៅឆ្នាំ 1999 ក្នុងវ័យជំទង់ ហើយបានរៀបការនៅខែមិថុនា ឆ្នាំ 2003 ។

Cech បានលេងឱ្យក្លឹប Chelsea និង Arsenal កំឡុងពេលអាជីពលេងនៅអង់គ្លេស Premier League ។

គាត់បានចូលរួមជាមួយក្រុមតោខៀវក្នុងឆ្នាំ 2004 ក្រោយចេញពីក្រុម Rennes នៃបារាំង Ligue 1 ក្នុងតម្លៃផ្ទេរជាប្រាក់ 7 លានផោន។ គាត់បានបង្ហាញខ្លួនចំនួន 494 លើកសម្រាប់ក្លឹបគាត់ហើយបានឈ្នះពានរង្វាន់ Premier League ចំនួន 4 ដង FA Cup ចំនួន 4 ដង និង League Cup ចំនួនបី។

គាត់ក៏ជាផ្នែកសំខាន់នៃជ័យជម្នះជាប្រវត្តិសាស្ត្ររបស់ Chelsea ក្នុងក្របខ័ណ្ឌ Champions League ក្នុងឆ្នាំ 2012 ។គាត់បានចាកចេញពីទឹកដី Stamford Bridge ក្នុងឆ្នាំ 2015 ហើយបានចំណាយពេល 4 ឆ្នាំនៅជាមួយ Arsenal ដោយបានបន្ថែមមេដាយជាអ្នកឈ្នះពានរង្វាន់ FA Cup មួយទៀតរបស់គាត់មុនពេលចូលនិវត្តន៍។