ខេត្តកំពង់ស្ពឺ ៖ ក្មេងស្រីម្នាក់អាយុ១៥ឆ្នាំបានបោកក្បាលស្លាប់នៅនឹងកន្លែងកើតហេតុ ខណៈជិះម៉ូតូលឿនពេលកំពុងធ្លាក់ភ្លៀង ហើយជ្រុលទៅបុកផ្លាកសញ្ញាចរាចរណ៍អមផ្លូវជាតិលេខ៤ពេញទំហឹង។
ហេតុការណ៍ក្មេងស្រីជិះម៉ូតូបុកផ្លាកសញ្ញាបោកក្បាលស្លាប់នេះ កើតឡើងកាលពីវេលាម៉ោងប្រមាណ៥និង៣០នាទីល្ងាចថ្ងៃទី១៧ ខែសីហា ឆ្នាំ២០២៥ នៅលើកំណាត់ផ្លូវជាតិលេខ៤ ចន្លោះបង្គោលគីឡូម៉ែត្រលេខ៨៦-៨៧ ស្ថិតក្នុងភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបានឱ្យដឹងថា ក្មេងស្រីរងគ្រោះឈ្មោះ ផន រក្សា អាយុ១៥ឆ្នាំ រស់នៅក្នុងភូមិ ឃុំខាងលើ ជិះម៉ូតូហុងដា សេ១២៥ ស៊េរីឆ្នាំ២០១២ ពណ៌ខ្មៅ ពាក់ផ្លាកលេខ តាកែវ ១H-៥៤៨៤ ធ្វើដំណើរតាមផ្លូវជាតិលេខ៤ពីកើតទៅលិច នៅពេលកំពុងរលឹមហើយផ្លូវសើម។លុះទៅដល់ចំណុចខាងលើ ស្រាប់តែជ្រុលចង្កូតធ្លាក់ផ្លូវទៅបុកបង្គោលផ្លាកសញ្ញាចរាចរណ៍នៅខាងជើងផ្លូវបណ្ដាលឲ្យបោកក្បាលស្លាប់ភ្លាមៗនៅកន្លែងកើតហេតុ ។
ប្រភពបន្តថា ក្រោយកើតហេតុនគរបាលចរាចរណ៍បានទៅពិនិត្យដល់ទីកន្លែង ហើយម៉ូតូត្រូវបានកក្រុមគ្រួសារយកទៅផ្ទះដោយខ្លួនឯង ។ ករណីខាងលើនេះដែរ សាច់ញាតិក្រុមគ្រួសារបានទទួលស្គាល់ថាជាគ្រោះថ្នាក់កើតឡើងដោយខ្លួនឯង ហើយសពត្រូវបានសមត្ថកិច្ចប្រគល់ជូនសាច់ញាតិយកទៅធ្វើបុណ្យតាមប្រពៃណី៕
