ភ្នំពេញ ៖ អគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ ដឹកនាំដោយ លោកឧត្តមសេនីយ៍ឯក ងួន ស្រេង។ អគ្គនាយកដ្ឋាននេះ មានតួនាទី ធ្វើជាសេនាធិការជូនរដ្ឋមន្ត្រីក្រសួងមហាផ្ទៃ លើការងារសវនកម្មផ្ទៃក្នុង និងអភិបាលកិច្ច ដើម្បីពង្រឹងប្រសិទ្ធភាព និងសុចរិតភាពប្រព័ន្ធគ្រប់គ្រងផ្ទៃក្នុង ក្នុងដំណើរការគ្រប់គ្រងហិរញ្ញវត្ថុសាធារណៈ ការគ្រប់គ្រងទ្រព្យសម្បត្តិរដ្ឋ ការគ្រប់គ្រងបុគ្គលិក និងការអភិវឌ្ឍសមត្ថភាព ស្ថាប័នទាំងនៅថ្នាក់ជាតិ និងថ្នាក់ក្រោមជាតិ ដែលស្ថិតក្រោមដែនសមត្ថកិច្ចក្រសួងមហាផ្ទៃ តាមផែនការប្រចាំឆ្នាំ និងបទបញ្ជារបស់រដ្ឋមន្ត្រីក្រសួងមហាផ្ទៃ។ នេះបើតាមអនុក្រឹត្យស្តីពីការរៀបចំ និងការប្រព្រឹត្តទៅនៃក្រសួងមហាផ្ទៃ។
ផ្អែកតាមអនុក្រឹត្យដដែល អគ្គនាយកដ្ឋានសវនកម្មផ្ទៃក្នុង មានភារកិច្ចជាអាទិ៍រួមមាន រៀបចំណែនាំអនុវត្តគោលការណ៍ ផែនការនីតិវិធី និងស្តង់ដាសវនកម្មផ្ទៃក្នុង ធ្វើសវនកម្មផ្ទៃក្នុងលើប្រសិទ្ធភាពនៃប្រព័ន្ធគ្រប់គ្រងផ្ទៃក្នុង លើការគ្រប់គ្រងហិរញ្ញវត្ថុសាធារណៈ ការគ្រប់គ្រងទ្រព្យសម្បត្តិរដ្ឋ និងការគ្រប់គ្រងបុគ្គលិក ស្របតាមស្តង់ដា និងក្រមសីលធម៌វិជ្ជាជីវៈនៃសវនកម្មផ្ទៃក្នុង ពិនិត្យឡើងវិញការអនុវត្តច្បាប់ បទបញ្ជា វិន័យថវិកា និងអភិបាលកិច្ចល្អនៅក្នុងប្រតិបត្តិការហិរញ្ញវត្ថុ ធ្វើសវនកម្មលើការក្លែងបន្លំ។
ធ្វើសវនកម្មលើការក្លែងបន្លំ បើតាមអគ្គនាយកដ្ឋានសវនកម្ម គឺជាដំណើរការត្រួតពិនិត្យ វាយតម្លៃ ដើម្បីស្វែងរក និងវិភាគភស្តុតាង នៃការក្លែងបន្លំហិរញ្ញវត្ថុ ការបំភាន់ ឬការរំលោភបំពានច្បាប់ ឧទាហរណ៍ ការលួចបន្លំប្រាក់ចំណូល ការក្លែងបន្លំចំណាយ ការបំភាន់ទ្រព្យសម្បត្តិរដ្ឋជាដើម។ ជាមួយគ្នានេះ គឺការធ្វើសវនកម្មតាមបទបញ្ជា ជាអាទិ៍ បទបញ្ជាដ៏ខ្ពង់ខ្ពស់របស់រដ្ឋមន្ត្រីក្រសួងមហាផ្ទៃ ឬសំណើ សាមីអង្គភាព សំដៅកំណត់រកចំណុចខ្វះខាតនៃប្រព័ន្ធគ្រប់គ្រងផ្ទៃក្នុង ដើម្បីធ្វើការកែលម្អ។
ជាមួយគ្នានេះ អគ្គនាយកដ្ឋានសវនកម្មក៏មានភារកិច្ច ពិនិត្យឡើងវិញលើកម្មវិធី នៃកិច្ចប្រតិបត្តិការគម្រោងចំណាយមូលធន ចំណាយវិនិយោគ ធ្វើសកម្មភាពលើការគ្រប់គ្រងហិរញ្ញវត្ថុ ដែលអនុវត្តតាមប្រព័ន្ធព័ត៌មានវិទ្យាសហការជាមួយអគ្គាធិការដ្ឋាននៃក្រសួងមហាផ្ទៃ អគ្គនាយកដ្ឋានសវនកម្មផ្ទៃក្នុង នៃក្រសួងសេដ្ឋកិច្ច និងហិរញ្ញវត្ថុ អាជ្ញាធរសវនកម្មជាតិ និងស្ថាប័នត្រួតពិនិត្យពាក់ព័ន្ធ ដើម្បីសម្របសម្រួលការងារពង្រឹង សមត្ថភាពជំនាញ សង្គតិភាពការងារ និងប្រសិទ្ធភាព នៃការបំពេញមុខងារសវនកម្មផ្ទៃក្នុង ធ្វើកិច្ចសហការទំនាក់ទំនងអន្តរជាតិ ដោយអនុវត្តតាមផែនការសហប្រតិបត្តិការ កិច្ចព្រមព្រៀងរបស់ក្រសួងមហាផ្ទៃ ពាក់ព័ន្ធនឹងការងារសវនកម្មផ្ទៃក្នុង ធ្វើរបាយការណ៍លទ្ធផលការងារសវនកម្មផ្ទៃក្នុង ដោយមានសេចក្តីសន្និដ្ឋាន វាយតម្លៃចំណុចខ្លាំង ចំណុចខ្វះខាត គោរពជូន ឯកឧត្តមអភិសន្តិបណ្ឌិត ទទួលអនុវត្តភារកិច្ច និងសិទ្ធិផ្សេងៗទៀតដែលរដ្ឋមន្រ្តីក្រសួងមហាផ្ទៃប្រគល់ឱ្យ។
លោក ឧត្តមសេនីយ៍ឯក ងួន ស្រេង បានបញ្ជាក់ថា ដើម្បីបន្តអភិវឌ្ឍអគ្គនាយកដ្ឋានសវនកម្មផ្ទៃក្នុង ឱ្យកាន់តែរឹងមាំ និងមានប្រសិទ្ធភាពខ្ពស់ ស្របតាមទិសដៅយុទ្ធសាស្ត្ររបស់រាជរដ្ឋាភិបាល និងតម្រូវការជាក់ស្តែងនៃការងារ អគ្គនាយកដ្ឋានសវនកម្មផ្ទៃក្នុង បានដាក់ទិសដៅការងារបន្តក្នុងឆមាសទី២ ឆ្នាំ២០២៥ ចំនួន៧ចំណុច រួមមាន ១. ពង្រឹងគុណភាព និងវិសាលភាពសវនកម្ម បន្ថែមពីលើសវនកម្មអនុលោមភាព ២. ជំរុញការប្រើប្រាស់បច្ចេកវិទ្យាឌីជីថល និងនវានុវត្តន៍លើប្រព័ន្ធការងារ ដោយប្រើប្រាស់ឧបករណ៍ឌីជីថល និងឧបករណ៍វិភាគទិន្នន័យសវនកម្ម ៣. លើកកម្ពស់ក្រមសីលធម៌ និងសុចរិតភាព តាមរយៈបន្តពង្រឹងវប្បធម៌ស្អាតស្អំ វិជ្ជាជីវៈ និងភាពស្មោះត្រង់ ៤. អភិវឌ្ឍសមត្ថភាពជំនាញបន្ថែម ដោយត្រូវកំណត់តម្រូវការបណ្តុះបណ្តាលជាក់លាក់សម្រាប់មន្ត្រីនីមួយៗ ៥. បង្កើនកិច្ចសហប្រតិបត្តិការ និងការសម្របសម្រួល ឱ្យកាន់តែជិតស្និទ្ធជាមួយសវនដ្ឋាន ក្រសួង-ស្ថាប័នពាក់ព័ន្ធ និងដៃគូអភិវឌ្ឍន៍ ៦. ត្រូវបន្តតាមដាននូវការអនុវត្តអនុសាសន៍សវនកម្ម និងវាយតម្លៃអំពីផលជាវិជ្ជមានដែលបានកើតចេញពីការ អនុវត្តតាមអនុសាសន៍ និង៧. ពង្រឹងការវាយតម្លៃហានិភ័យជាប្រចាំដែលអាចកើតមានចំពោះប្រតិបត្តិការ និងគោលបំណងរបស់ក្រសួង ព្រមទាំងរៀបចំផែនការសវនកម្មដោយផ្អែកលើហានិភ័យ ដើម្បីធានាថាធនធានសវនកម្មត្រូវបានប្រើប្រាស់ ប្រកបដោយប្រសិទ្ធភាពបំផុត។
លោក ងួន ស្រេង បញ្ជាក់ម្ដងទៀតថា បន្ថែមពីការដាក់ចេញនូវទិសដៅការងារបន្ត អគ្គនាយកដ្ឋានសវនកម្មផ្ទៃក្នុង ក៏បានអនុវត្តតាមគោលការណ៍ណែនាំ និងចង្អុលបង្ហាញដ៏ខ្ពង់ខ្ពស់របស់ លោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដែលតែងតែ គិតគូនិងយកចិត្តទុកដាក់ខ្ពស់ដល់អគ្គនាយកដ្ឋាន ដើម្បីបង្កើនប្រសិទ្ធភាព ប្រសិទ្ធផល ក្នុងការអនុវត្តការងារឱ្យមានប្រសិទ្ធភាព និងនិរន្តរភាព។
គួរបញ្ជាក់ថា អគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ មានរចនាសម្ព័ន្ធ៤ មានជាអាទិ៍ ១.នាយកដ្ឋានរដ្ឋបាលសរុប ២.នាយកដ្ឋានសវនកម្មទី១ ៣.នាយកដ្ឋានសវនកម្មទី២ និង៤.នាយកដ្ឋានសុចរិតភាព និងអភិបាលកិច្ច៕
