ខេត្តកំពង់ធំ៖ កម្លាំងសមត្ថកិច្ចជំនាញ ក.ប.ប នៃក្រសួងពាណិជ្ជកម្ម បានចុះស្រាវជ្រាវបង្រ្កាបទំនិញចម្រុះខូចគុណភាពដែលឈ្មួញនាំចូលខុសច្បាប់ ពីប្រទេសជិតខាង គឺដើម្បីធានាការពារនូវសុខុមាលភាពជូនអ្នកប្រើប្រាស់ ទប់ស្កាត់ផលិតផលិតទំនិញមិនសមស្រប ពិសេសផលិតផលម្ហូបអាហារដែលមិនអនុលោមតាមលក្ខខ័ណ្ឌតម្រូវផ្នែកបច្ចេកទេស ឬមានកត្តាជាគ្រោះណាមួយ ធ្វើឱ្យប៉ះពាល់សុខភាពអ្នកប្រើប្រាស់ជាយថាហេតុ។
ជាក់ស្ដែងក្រោមការដឹកនាំ និងសម្របសម្រួលដោយលោក សាយ វាសនា ព្រះរាជអាជ្ញារងខេត្តកំពង់ធំ កាលពីថ្ងៃទី២០ ខែសីហា ឆ្នាំ២០២៥ មន្រ្តីសាខា ក.ប.ប. ខេត្តកំពង់ធំ សហការជាមួយ មន្រ្តីនៃមន្ទីរពាណិជ្ជកម្មខេត្តកំពង់ធំ មន្រ្តីនៃរដ្ឋបាលជលផលខេត្តកំពង់ធំ និងនគរបាលប្រឆាំងបទស្មើសសេដ្ឋកិច្ចខេត្តកំពង់ធំ បានចុះត្រួតពិនិត្យទំនិញដែលមានហានិភ័យដែលបានដឹកតាមរថយន្តក្រុង១គ្រឿង មានដូចជា ត្រីសាលម៉ុន ចំនួន ១៤០កេស ស្មើនឹង ៣០១០គីឡូក្រាម គឿងក្នុងសត្វមាន់ ចំនួន ២១០កេស ស្មើនឹង ២៥២០គីឡូក្រាម ទឹកសុីអុីវ ចំនួន ១០០ប៊ីដុង ស្មើនឹង ៤០០លីត្រ វ៉ាសាប៊ិ ចំនួន ២កេស ស្មើនឹង ១០០គីឡូក្រាម សរុបចំនួន ៥,៦៣០គីឡូក្រាម នឹង ៤០០លីត្រ ។
មន្ត្រីជំនាញ បានបញ្ជាក់ថា ជាលទ្ធផល ក្រោយពីមន្រ្តីជំនាញធ្វើការត្រួតពិនិត្យបានរកឃើញថាទំនិញទាំងអស់ត្រូវបានខូចគុណភាព ដោយសារការដឹកជញ្ជូន និងការរក្សាទុក ពុំត្រឹមត្រូវតាមលក្ខខណ្ឌតម្រូវផ្នែកបច្ចេកទេស។ ហេតុនេះព្រះរាជអាជ្ញារងក៏បានអនុញ្ញាតឱ្យរឹបអូសដើម្បីធ្វើការកម្ទេចចោលទៅតាមនីតិវិធី”៕
ដោយ៖តារា
