ភ្នំពេញ៖ ហេតុការណ៍បាញ់បោះដោយសេរីបានកើតឡើងជាច្រើនលើកច្រើនសារនៅក្នុងទីក្រុងភ្នំពេញ រហូតដល់មានករណីខ្លះបាត់បង់ទ្រព្យសម្បត្តិដ៏មានតម្លៃនិងខ្លះទៀតស្លាប់បាត់បង់ជីវិត។
ជាក់ស្តែងនៅវេលាម៉ោង ១២និង៤៥ នាទីរំលងអាធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៦ នៅចំណុចផ្លូវលេខ៦៣កែងផ្លូវ២៧៨ ស្ថិតក្នុងសង្កាត់បឹងកេងកងទី១ ខណ្ឌចំការមន មានករណីបាញ់មួយគ្រាប់បង្កការផ្អើលដល់សមត្ថកិច្ចមូលដ្ឋាន ចំណែកអ្នកបង្កគេចខ្លួនបាត់ស្រមោល។
បើតាមសាក្សីដែលជាសន្តិសុខយាមនៅហាងក្បែរនោះបានអោយដឹងថា មុនពេលកើតហេតុគាត់មិនបានដឹងថាមានរឿងអ្វីទេ ស្រាប់តែលឺសូរសំលេងផ្ទុះអាវុធមួយគ្រាប់ បន្ទាប់មកឃើញយុវជនម្នាក់រត់តាមបណ្តោយផ្លូវលេខ៦៣ក្នុងទឹសដៅពីត្បូងទៅជើង ភ្លាមៗនោះខ្មាន់កាំភ្លើងដែលមានគ្នាប្រហែល៦នាក់បានជិះម៉ូតូ៤គ្រឿងដេញតាមពីក្រោយចេញទៅបាត់ ។
ក្រោយពេលកើតហេតុសមត្ថកិច្ចបានមកដល់និងបានរកឃើញសំបកកាទុសមួយគ្រាប់ ដោយសមត្ថកិច្ចបានសន្និដ្ឋានថាកាំភ្លើងដែលខ្មាន់កាំភ្លើងប្រើនោះម៉ាក កា៥៤ ។
ទោះយ៉ាងណាក៏ដោយ ក្នុងករណីនេះមិនមានមនុស្សរងរបួសទេ ហើយសមត្ថកិច្ចសន្និដ្ឋានជំហ៊ានដំបូងថាករណីនេះអាចជាករណីគំនុំ ៕
ដោយ៖ ជីម ភារ៉ា ដង្កោ
