អន្តរជាតិ ៖ ថ្ងៃទី២៧ខែសីហាឆ្នាំ២០២៥ លោក Wang Huning ប្រធានសភាប្រឹក្សានយោបាយប្រជាជនទូទាំងប្រទេសចិនបានជួបជាមួយលោក Andrea Caroni ប្រធានសភាសហព័ន្ធស្វ៊ីសនៅទីក្រុងប៉េកាំង។
លោក Wang Huning បានថ្លែងថា ក្នុងរយៈពេល៧៥ឆ្នាំបន្ទាប់ពីការបង្កើតទំនាក់ទំនងការទូតមក ប្រទេសចិននិងស្វ៊ីសបានរាប់អានគ្នាដោយស្មើភាពជាប់រហូតមក។ភាគីចិនមានឆន្ទៈធ្វើការជាមួយភាគីស្វ៊ីស ដើម្បីរឹតបន្តឹងចំណងមិត្តភាពរវាងប្រជាជននិងប្រជាជនឱ្យកាន់តែជិតស្និទ្ធ និងបង្កើនកិច្ចសហប្រតិបត្តិការពហុភាគី ដើម្បីធ្វើឱ្យទំនាក់ទំនងភាពជាដៃគូយុទ្ធសាស្ត្រនវានុវត្តន៍រវាងចិននិងស្វ៊ីសនាំមកនូវផលប្រយោជន៍កាន់តែច្រើនដល់ប្រជាជននៃប្រទេសទាំងពីរ។សភាប្រឹក្សានយោបាយប្រជាជនទូទាំងប្រទេសចិនរីករាយរួមចំណែកក្នុងការជំរុញការអភិវឌ្ឍទំនាក់ទំនងមេត្រីភាពរវាងចិននិងស្វ៊ីស។
ជាការឆ្លើយតប លោក Andrea Caroni បានថ្លែងថា លោកមានក្តីសោមនស្សរីករាយណាស់ដែលបានមកបំពេញទស្សកិច្ចនៅប្រទេសចិនក្នុងឱកាសខួបទី៧៥ឆ្នាំនៃការបង្កើតទំនាក់ទំនងការទូតរវាងប្រទេសស្វ៊ីសនិងចិន។សមត្ថភាពផ្នែកច្នៃប្រឌិតថ្មីនិងសមិទ្ធផលនៃការអភិវឌ្ឍរបស់ប្រទេសចិនគួរឱ្យចាប់អារម្មណ៍យ៉ាងខ្លាំង។ប្រទេសស្វ៊ីសប្រកាន់ខ្ជាប់នូវគោលនយោបាយចិនមួយ សង្ឃឹមថា ភាគីទាំងពីរនឹងធ្វើកិច្ចសហប្រតិបត្តិការជាក់ស្តែងកាន់តែស៊ីជម្រៅ ពន្លឿនការជំរុញការចរចាអំពីការលើកតម្ពស់កម្រិតនៃកិច្ចព្រមព្រៀងពាណិជ្ជកម្មសេរី ក៏ដូចជារួមគ្នាគាំពារពហុភាគីនិយមព្រមទាំងសន្តិភាពនិងស្ថិរភាពនៃពិភពលោក៕
ប្រភព ៖ (CCFR)
