វៀតណាម៖ ក្រសួងការបរទេស និងសហប្រតិបត្តិការអន្តរជាតិ នៅរសៀលថ្ងៃទី ២៨ ខែសីហា ឆ្នាំ២០២៥ បានឱ្យដឹងថា លោក ស៊ុន សុវណ្ណា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាអ្នកសម្របសម្រួលជាតិអមអង្គការអន្តរជាតិហ្រ្វង់កូហ្វូនី (OIF) កាលពីថ្ងៃទី២៦ សីហា ថ្មីៗនេះ បានចូលជួបពិភាក្សាការងារជាមួយ លោក Dang Hoang Giang អនុរដ្ឋមន្ដ្រីការបរទេសវៀតណាម ទទួលបន្ទុកអង្គការអន្ដរជាតិ នៅទីស្តីការក្រសួងការបរទេសនៃសាធារណរដ្ឋសង្គមនិយមវៀតណាម។
ជំនួបពិភាក្សានេះ ផ្តោតលើវឌ្ឍនភាពនៃការរៀបចំកិច្ចប្រជុំកំពូលហ្វ្រង់កូហ្វូនីលើកទី២០ នៅកម្ពុជា និងការចែករំលែកបទពិសោធន៍របស់ប្រទេសវៀតណាម ក្នុងការរៀបចំកិច្ចប្រជុំកំពូលនេះ កាលពីឆ្នាំ១៩៩៧ រួមទាំងការអញ្ជើញសាធារណរដ្ឋសង្គមនិយមវៀតណាម ត្រៀមចូលរួមកិច្ចប្រជុំកំពូលហ្រ្វង់កូហ្វូនី និងព្រឹត្តិការណ៍អមនានា នៅឆ្នាំ២០២៦ ខាងមុខនេះ។
ដោយឡែក កាលពីថ្ងៃទី២៥ ខែសីហា ឆ្នាំ២០២៥ លោក ស៊ុន សុវណ្ណា ក៏បានជួបប្រជុំការងារជាមួយលោក Nicolas Mainetti នាយកទីភ្នាក់ងារឧត្តមសិក្សាប្រើប្រាស់ភាសាបារាំង (AUF) ប្រចាំតំបន់អាស៊ី និងប៉ាស៊ីហ្វិក នៅទីស្នាក់ការ AUF ក្នុងរដ្ឋធានីហាណូយ។ លោករដ្ឋលេខាធិការ ក៏បានថ្លែងអំណរគុណ AUF ចំពោះវគ្គបណ្ដុះបណ្ដាលមន្ត្រីទំនាក់ទំនង ចំនួន ៣០០នាក់ សម្រាប់កិច្ចប្រជុំកំពូលហ្វ្រង់កូហ្វូនីលើកទី២០ និងគម្រោងសកម្មភាពការងារនៅកម្ពុជា ក្នុងក្របខណ្ឌតំបន់របស់ AUF ផងដែរ។
នៅថ្ងៃដដែល លោក ស៊ុន សុវណ្ណា បានជួបពិភាក្សាការងារជាមួយលោក Edgar Doerig តំណាងអង្គការអន្តរជាតិហ្វ្រង់កូហ្វូនីប្រចាំតំបន់អាស៊ី និងប៉ាស៊ីហ្វិក (REPAP) នៅទីស្នាក់ការ REPAP ក្នុងរដ្ឋធានីហាណូយ ដើម្បីពិភាក្សាអំពីវឌ្ឍនភាពនៃការរៀបចំកិច្ចប្រជុំហ្វ្រង់កូហ្វូនីលើកទី២០ នៅកម្ពុជា និងគម្រោងកិច្ចសហការរវាងអង្គការ OIF និងស្ថាប័នរដ្ឋ និងឯកជននានា នៅកម្ពុជា រួមទាំងបានពិភាក្សាផងដែរ អំពីប្រទេសដែលនឹងក្លាយជាប្រធានបន្ទាប់នៃបណ្តាញរចនាសម្ព័ន្ធ និងស្ថាប័នទទួលបន្ទុកហ្វ្រង់កូហ្វូនីប្រចាំអាស៊ី-ប៉ាស៊ីហ្វិក (RESIFAP)៕
ដោយ៖តារា
