ខេត្តក្រចេះ ៖ មានករណីខ្យល់បោកបក់ខ្លាំងបណ្ដាលឱ្យលិចទូកកណ្ដាលបឹង ហើយស្លាប់ក្មេងប្រុស២នាក់យ៉ាងអាណោចអាធម្ម កាលពីវេលាម៉ោង១៧ និង៣០នាទីថ្ងៃទី០៧ ខែកញ្ញា ឆ្នាំ២០២៥ស្ថិតនៅចំណុចភូមិថ្មរាប ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។
តាមប្រភពពីឈ្មោះ ទី សោភាង ភេទប្រុស អាយុ៤៤ឆ្នាំ ត្រូវជាឪពុកបង្កើតរបស់ជនរងគ្រោះ បានបំភ្លឺថា នៅថ្ងៃទី០៧ ខែកញ្ញា ឆ្នាំ២០២៥ វេលាម៉ោង១៧ និង៣០នាទី ខ្លួនបាននាំកូនប្រុសចំនួន២នាក់ ជិះទូកទៅមើលស្រែ និងឱ្យចំណីត្រីនៅចំណុចទួលក្រសាំង ភូមិថ្មរាប។ ពេលជិះទូកដល់កណ្តាលបឹងស្រាប់តែមានខ្យល់បកមកខ្លាំងបង្កជាទឹករលកបក់បោកបណ្តាលឲ្យលិចទូក ។
លោកឪពុកបន្តថា ដោយសារទឹករលកខ្លាំងពេកខ្លួនជួយកូនមិនឈ្នះ ខ្លួនក៏ហែលទឹកមកដល់ត្រើយម្ខាងប្រាប់បងប្អូនប្រជាពលរដ្ឋឲ្យជួយស្វែងរក។ ក្រោយកើត ហេតុលនៅវេលាម៉ោង២០ និង៣០នាទី អ្នកភូមិជួយស្វែងរកដោយប្រើសំណាញ់បង់ទើបរកឃើញ ប៉ុន្តែពួកគេបានស្លាប់បាត់ទៅហើយ ។
ការពិនិត្យសាកសព កម្លាំងជំនាញ នៃអធិដ្ឋាននគរបាលស្រុកព្រែក ប្រសព្វ និងកម្លាំងប៉ុស្ដិ៍នគរបាលរដ្ឋបាលព្រែកប្រសព្វ ដោយមានការចូលរួមពីអាជ្ញាធរមូលដ្ឋាន ចុះដល់ផ្ទះជនរងគ្រោះពិនិត្យឃើញ សពឈ្មោះ ឃុន
វណ្ណា ភេទប្រុស អាយុ១៤ឆ្នាំ និង ឈ្មោះ ឃុន វ៉ាន់នី ភេទប្រុស អាយុ១២ឆ្នាំត្រូវបងប្អូនបង្កើតមានសភាពរឹង ស្លែកស្លាំង មិនមានស្លាកស្នាមអ្វីគួរអោយកត់សម្គាល់ទេ និងមិនពាក់ព័ន្ធបទល្មើសព្រហ្មទណ្ឌឡើយ។
បន្ទាប់ពីពិនិត្យសពរួចរាល់សមត្ថកិច្ចបានធ្វើកំណត់ ហេតុប្រគល់សព ជូនក្រុមគ្រួសារយកធ្វើបុណ្យតាមប្រពៃណី ៕
