ភ្នំពេញ៖ លោក សាយ សំអាល់ ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី១៥ ខែកញ្ញា ឆ្នាំ២០២៥ បានអញ្ជើញជួបសំណេះសំណាល និងសាកសួរសុខទុក្ខកងទ័ព នៃបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ឱកាសពិធីបុណ្យកាន់បិណ្ឌភ្ជុំបិណ្ឌ ។ ពិធីនេះបានធ្វើនៅបញ្ជាការដ្ឋានកងទ័ពជើងគោក ។
លោកឧបនាយករដ្ឋមន្ត្រី សាយ សំអាល់ បានមានប្រសាសន៍លើកឡើងថា អង្គភាពក្រសួងរៀបចំដែនដី នគរូបនីយកម្ម និងសំណង់ ជាសម្ព័ន្ធមេត្រីភាពជាមួយបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ បានរួមចំណែក និងស្ថិតនៅសមរភូមិក្រោយ ដែលរង់ចាំជួយជ្រោមជ្រែងផ្តល់នូវអ្វីដែលជាតម្រូវការចាំបាច់សម្រាប់កងទ័ព ទាំងស្មារតី និងសម្ភារៈ ដើម្បីបុព្វហេតុជាតិមាតុភូមិ ។
លោកឧបនាយករដ្ឋមន្ត្រី សាយ សំអាល់ បានមានប្រសាសន៍ថា តាមទំលាប់ជារៀងរាល់ឆ្នាំក្នុងឱកាសពិធីបុណ្យកាន់បិណ្ឌ ភ្ជំបិណ្ឌ តែងតែមានការជួបជុំសំណេះសំណាលសួរសុខទុក្ខរវាងក្រសួង និងអង្គភាពសម្ព័ន្ធមេត្រីភាពដូចជាបញ្ជាការដ្ឋានកងទ័ពជើងគោក ដើម្បីបានសាកសួរពីសុខទុក្ខរបស់កងទ័ព និងសំណូមពរផ្សេងៗដែលក្រសួងរៀបចំដែនដី នគរូបនីយកម្ម និងសំណង់អាចជួយបាន។
លោកឧបនាយករដ្ឋមន្ត្រី បានថ្លែងនូវការកោតសរសើរចំពោះបញ្ជាការដ្ឋានកងទ័ពជើងគោក ដែលក្នុងរយៈពេលមួយឆ្នាំមកនេះ បានចូលរួមយ៉ាងសស្រាក់ស្រាំ ក្នុងបេសកកម្មជាប្រវត្តិសាស្ត្ររបស់កងទ័ព ក្នុងកិច្ចការថែរក្សាសុខសន្តិភាពនិងស្ថិរភាពនយោបាយរបស់កម្ពុជា ពិសេសការពារបូរណភាពទឹកបានរឹងមាំពីការឈ្លានពានរស់កងទ័ពសៀម ៕
ដោយ៖តារា
