ភ្នំពេញ៖ ផ្ទះធ្វើសិប្បកម្មពូកសាឡុង មួយកន្លែងត្រូវបានអគ្គិភ័យឆាបឆេះបង្កការភ្ញាក់ផ្អើលពលរដ្ឋនិងសមត្ថកិច្ចចេញរថយន្តពន្លត់អគ្គីភ័យអន្តរាគមន៍បាញ់ពន្លត់ ។
ហេតុការណ៍នេះបានកើតឡើងនៅវេលាម៉ោង ១១និង១០នាទីយប់ ថ្ងៃទី១៧ខែកញ្ញាឆ្នាំ២០២៥នៅចំនុចផ្ទះល្វែងអត់លេខ ធ្វើសិប្បកម្មពូកសាឡុង ស្ថិតនៅផ្លូវបេតុង ភូមិព្រៃសកេីត សង្កាត់ព្រៃស ខណ្ឌដង្កោ ។
តាមប្រភពព័ត៌មាន ពីប្រជាពលរដ្ឋ បានអោយដឹងថា មុនពេលកេីតហេតុ គឺម្ចាស់ផ្ទះបានអង្គុយផឹកស៊ីនៅខាងក្រៅផ្ទះ ចំណែកកូនចៅប្រុស២ទៅ៣នាក់ កំពុងតែហូបបាយនៅខាងក្នុងផ្ទះ ខណៈដែលពួកគាត់ទាំងនោះកំពុងហូបបាយសុខៗស្រាប់តែធំក្លិនឈ្ងៀម ហេីយតែឃើញអណ្ដាតភ្លើងឆេះសន្ធោសន្ធៅ ចេញពីបន្ទប់ឡៅតឿដោយមិនដឹងមូលហេតុអ្វីនោះទេ ហើយដោយឃើញហេតុការណ៍បែបនេះ ពួកគាត់នាំគ្នាឆោឡោមានអ្នកខ្លះបាញ់ទឹកពន្លត់ អ្នកខ្លះទៀតបាននាំគ្នាជួយជញ្ជូន ឥវ៉ាន់ពូកសាឡុងចេញមកក្រៅ តែក្នុងករណីនេះមិនអាច គ្រប់គ្រងស្ថានការណ៍បាន ទេីបនាំគ្នារាយការណ៍ជូនអាជ្ញាធរនិងសមត្ថកិច្ចដើម្បីសុំជំនួយរថយន្តពន្លត់អគ្គីភ័យមកអន្តរាគមន៍បាញ់មានចំនួន៣គ្រឿង ចេញអន្តរាគមន៍ក្នុងមានរថយន្តពន្លត់អគ្គីភ័យរបស់ការិយាល័យបង្ការនិងពន្លត់អគ្គីភ័យរបស់ស្នងការដ្ឋាននគរបាលរាជធានីភ្នំពេញចំនួន២គ្រឿង និងរថយន្តជំនួយរបស់ក្រុមហ៊ុនស្រាបៀរកម្ពុជាចំនួន១គ្រឿង បានសហការគ្នាបាញ់ទឹករហូតដល់ម៉ោង១១និង៣០នាទីយប់ថ្ងៃដដែលទេីបធ្វើអោយភ្លើងរលត់ទៅវិញជាស្ថាពរ ។
ពាក់ព័ន្ធករណីនេះផងដែរមិនបង្ករឲ្យការរាលដាលដល់ផ្ទះសម្បែងរបស់ប្រជាពលផ្សេងៗណានោះទេ ហេីយក៍មិនគ្រោះថ្នាក់ដល់មនុស្សណាម្នាក់ដែរ គឺគ្រាន់តែខូចខាតសំភារៈក្នុងបន្ទប់ឡៅតឿ មានគ្រែពូកសាឡុង អស់ទាំងស្រុងតែប៉ុណ្ណោះ ចំពោះមូលហេតុបណ្តាលមកពីឆ្លងចរន្តអគ្គិសនី ៕
ដោយ៖សុខាសែនជ័យ
