ខេត្តកំពង់ចាម ៖ ជាងផ្សារដែក២នាក់ បានតសំយ៉ាបមុខផ្ទះរបស់ប្រជាពលរដ្ឋមួយកន្លែង នៅក្នុងឃុំស្ពឺ ស្រុកចំការលើ ។ ដោយសារខ្វះការប្រុងប្រយ័ត្ន ពេលលើកដែកពីដីមកលើកន្ទុយដែកប៉ះនឹងខ្សែកាប ដែលមានតុងស្យុងខ្ពស់ បណ្ដាលឱ្យឆក់ជាងពីរនាក់ធ្លាក់មកដី តែគ្រោះអកុសលពេលបញ្ជូនទៅសង្គ្រោះនៅមន្ទីរពេទ្យជាងផ្សារដែកម្នាក់បានស្លាប់ ។ ហេតុការណ៍នេះ បានកើតឡើងនៅវេលាម៉ោង៣ និង៤០នាទីរសៀលថ្ងៃទី១៨ កញ្ញា ឆ្នាំ២០២៥ បង្កឲ្យមានការភ្ញាក់ផ្អើលដល់កម្លាំងសមត្ថកិច្ចចុះទៅពិនិត្យសព។
លោកវរសេនីយ៍ឯកកែវ ស៊ាងហ៊ាន់ អធិការនគរបាលស្រុកចំការលើបានឱ្យដឹងថា ហេតុការណ៍ដែលបានកើតឡើង ចំពោះជាងផ្សារដែកទាំងពីរនាក់នោះ គឺស្ថិតនៅភូមិភូមិអរវាយ ឃុំស្ពឺ ស្រុកចំការលើ ។ សាកសពឈ្មោះនី ណាត ភេទប្រុស អាយុ៣៤ឆ្នាំ ជនជាតិខ្មែរ រស់នៅភូមិអូរវាយ ឃុំស្ពឺ ស្រុកចំការលើ ខេត្តកំពង់ចាម ដែលបានស៊ីឈ្នួលផ្សារដែក និងបានឡើងផ្សារលើដំបូលសំយ៉ាបមុខផ្ទះ ហើយលើកដែកទៅប៉ះ និងខ្សែរកាបអគ្គីសនី បណ្ដាលឱ្យឆក់ស្លាប់នៅមុខផ្ទះឈ្មោះម៉ៅ សុខឃី ភេទស្រី អាយុ៣៥ឆ្នាំ ស្ថិតក្នុងភូមិភូមិអរវាយ ឃុំស្ពឺ ស្រុកចំការលើ ខេត្តកំពង់ចាម ។
អធិការនគរបាលស្រុកចំការលើបន្តឲ្យដឹងទៀតថា ប៉ុស្តិ៍នគរបាលរដ្ឋបាលស្ពឺបានទទួលព័ត៌មានពីលោកមេភូមិអូរវាយថា មានករណីមនុស្សឆក់ខ្សែភ្លើង បណ្តាលឲ្យស្លាប់ ។
ក្រោយពីទទួលបបានព័ត៌មានខាងលើភ្លាម លោកនាយប៉ុស្ដិ៍បានរាយការណ៍ជូនរូបលោក បានចាត់ឲ្យជំនាញពិនិត្យនិងវិភាគកន្លែងកើតហេតុ និងកំលាំងប៉ុស្តិ៍នគរបាលរដ្ឋបាលស្ពឺ បានចុះទៅដល់ កន្លែងកើតហេតុបង្កើតគណៈកម្មកាចំរុះ ពិនិត្យសាកសព៕
