ខេត្តបាត់ដំបង៖ លោកឧត្តមសេនីយ៍ ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង បានឱ្យដឹងនៅព្រឹកថ្ងៃទី២៥ ខែកញ្ញា ឆ្នាំ២០២៥នេះថា៖ ក្រុមយុវជនទំនើងមួយក្រុម សល់ចំហាយភ្ជុំបិណ្ឌបង្ហោះម៉ូតូបង្ហេីយសាំងនៅតាមដងផ្លូវ ត្រូវបានកម្លាំងសមត្ថកិច្ចជំនាញស្រុក ចុះបង្រ្កាបនាំខ្លួនយកមកណែនាំ និងដកហូតម៉ូតូយកមករក្សាទុករយៈពេល ០៣ខែសិននៅស្រុកថ្មគោល។
លោកឧត្តមសេនីយ៍ទោស្នងការ បានឱ្យដឹងទៀតថា ជាក់ស្ដែងនៅល្ងាចថ្ងៃទី២៤ ខែកញ្ញា ឆ្នាំ២០២៥ វេលាម៉ោង១៦ និង៣០នាទី នៅចំណុចផ្លូវលំស្ថិតក្នុងភូមិថ្មី ឃុំតាម៉ឺន ស្រុកថ្មគោល ខេត្តបាត់ដំបង លោកវរសេនីយ៍ឯក សេង លុច អធិការនគរ បាលស្រុកថ្មគោល ដឹកនាំកម្លាំងជំនាញសហការជាមួយនិងប៉ុស្តិ៍នគរបាលរដ្ឋបាលតាម៉ឺន បង្ក្រាបនិងនាំខ្លួនក្មេងទំនើងបង្ហោះម៉ូតូតាមដងផ្លូវបានចំនួន ០៤នាក់ និងដកហូតបានម៉ូតូចំនួន០២គ្រឿងនាំមកកាន់អធិការដ្ឋាននគរបាលស្រុក ដើម្បីសាកសួរ។
ក្រោយឃាត់ខ្លួនយកមកសាកសួរ កម្លាំងសមត្ថកិច្ចជំនាញ បានដកហូតម៉ូតូយកមករក្សាទុករយៈពេល ០៣ ខែ និងអប់រំណែនាំឱ្យឪពុក ម្តាយធានាយកទៅមូលដ្ឋានវិញអប់រំបន្ថែម៕
ដោយ៖បាត់ដំបង
