ភ្នំពេញ៖ កម្លាំងនគរបាលខណ្ឌទួលគោក បានដាក់គោលដៅត្រួតពិនិត្យនិងអនុវត្តច្បាប់ចរាចរណ៍ កាលពីព្រឹកថ្ងៃទី០៦ ខែកញ្ញា ឆ្នាំ២០១៦នេះ  នៅចំណុចផ្លូវកម្ពុជាក្រោម កែងនិងផ្លូវ២៥៩ ក្នុងសង្កាត់ទឹកល្អក់១ ខណ្ឌទួលគោក ដោយឃាត់ខ្លួនជនសង្ស័យ២នាក់ ជិះម៉ូតូ១គ្រឿង គ្មានមួក គ្មានកញ្ចក់ ពេលនោះកម្លាំងនគរបាលហៅត្រួតពិនិត្យនិងឆែកឆេររកឃើញនូវសារធាតុញៀនប្រភេទម្សៅក្រាមពណ៌សថ្លា ចំនួន១១កញ្ចប់តូចជាក់ស្តែង ។

ជនសង្ស័យទី១-ឈ្មោះ ឯម សុភ័ក្រ្ត ភេទប្រុស អាយុ៣២ឆ្នាំ មុខរបរកូនជាងផ្សារដែក និងស្នាក់នៅផ្ទះ៨៦២ ផ្លូវកម្ពុជាក្រោម ក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ។ ទី២-ឈ្មោះ នឹម សម្បត្តិ ភេទប្រុស អាយុ៣៣ឆ្នាំ មុខរបរកូនជាងផ្សារដែក និងស្នាក់នៅម្ដុំរោងចក្រ មិថុនា ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

ប្រភពព័ត៌មានពីសមត្ថកិច្ចឲ្យដឹងថា នៅមុនពេលឃាត់ខ្លួនជនសង្ស័យទាំង២ គឺកម្លាំងនគរបាលចម្រុះខណ្ឌទួលគោកបានដាក់គោលដៅត្រួតពិនិត្យនិងអនុវត្តច្បាប់ចរាចរណ៍ នៅចំណុចផ្លូវកម្ពុជាក្រោម កែងនិងផ្លូវ២៥៩ ក្នុងសង្កាត់ទឹកល្អក់១ ខណ្ឌទួលគោក នៅព្រឹកថ្ងៃទី០៦ ខែកញ្ញា ឆ្នាំ២០១៦ ខណៈកំពុងចុះប្រតិបត្តិការអនុវត្ត មានជនសង្ស័យ២នាក់ ជិះម៉ូតូ១គ្រេឿង ម៉ាកសង់សេ១២៥ សេរីឆ្នាំ២០១២ ពណ៌ខ្មៅ ពាក់ស្លាកលេខ បន្ទាយមានជ័យ 1G-2196 គ្មានមួក គ្មានកញ្ចក់ បានជិះតាមបណ្ដោយផ្លូវកម្ពុជាក្រោម ក្នុងទិសដៅពីលិចទៅកើត ក៏បានមកដល់ចំណុច កម្លាំងនគរបាល ដាក់គោលដៅបានឃាត់ខ្លួនត្រួតពិនិត្យក៏ឆែករកឃើញនូវប្រភេទក្រាមសថ្លា ចំនួន១១កញ្ចប់តូចតែម្ដង។

បច្ចុប្បន្នជនសង្ស័យរួមនិងថ្នាំញៀនត្រូវបានកម្លាំងនគរបាលឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីចាត់ការតាមច្បាប់៕

ដោយ៖ ស ដារ៉ា