សារព័ត៌មានចិន Xinhua បានផ្សាយថា អតីតនាយករដ្ឋមន្ត្រីថៃ លោកស្រី Paetongtarn Shinawatra នៅថ្ងៃពុធ ទី២២ ខែតុលា បានប្រកាសលាលែងចេញពីតំណែងជាមេដឹកនាំគណបក្សភឿងថៃ ជាការសម្រេចចិត្តមួយ ធ្វើឡើង ក្រោយលោកស្រីត្រូវបានតុលាការធម្មនុញ្ញថៃទម្លាក់ចេញពីតំណែង។

នៅក្នុងសេចក្ដីថ្លែងការណ៍មួយ លោកស្រី Paetongtarn បានបង្ហាញពីបំណងផ្ដួចផ្ដើមធ្វើកំណែទម្រង់គ្រប់ជ្រុងជ្រោយមួយរបស់គណបក្សភឿថៃ មុននឹងការបោះឆ្នោតសកលចូលមកដល់។ លោកស្រី បានគូសបញ្ជាក់ដូច្នេះថា «ខ្ញុំជឿជាក់យ៉ាងមុតមាំថាការផ្លាស់ប្ដូរនេះត្រូវតែចាប់ផ្ដើមដោយមិនត្រូវបង្អង់នោះទេ។ ដូច្នេះខ្ញុំសម្រេចចិត្តជ្រើសរើសយកការលាលែងចេញពីតំណែងជាប្រធានបក្ស ដើម្បីបើកផ្លូវឱ្យគណបក្សធ្វើកំណែទម្រង់ និងកសាងភាពរឹងមាំដ៏ខ្លាំងក្លាមួយ»។
លោកស្រី Paetongtarn បន្ថែមថាលោកស្រីនឹងនៅតែបន្តធ្វើជាសមាជិកបក្សភឿថៃ និងជាប្រមុខនៃក្រុមគ្រួសារភឿថៃ ជាមួយការប្ដេជ្ញាចិត្តជួយកសាងយុគសម័យថ្មីរបស់បក្សដែលឈរប្រកៀកស្មា យ៉ាងរឹងមាំជាមួយប្រជាជនថៃ។ ការសម្រេចចិត្តលាលែងពីតំណែងជាមេដឹកនាំបក្សភឿថៃរបស់លោកស្រី Paetongtarn ធ្វើឡើងបន្ទាប់ពីតុលាការធម្មនុញ្ញថៃទម្លាក់លោកស្រីចេញពីតំណែង កាលពីខែសីហាកន្លងទៅ ជុំវិញការរំលោភលើក្រមសីលធម៌ ក្នុងការដោះស្រាយបញ្ហាជម្លោះព្រំដែនជាមួយកម្ពុជា៕

រូបថត​: Bloomberg