Lionel Messi បានបន្តកិច្ចសន្យារបស់គាត់ជាមួយក្លឹប Inter Miami របស់ MLS ដល់ឆ្នាំ 2028មានន័យថាវាត្រូវត្រូវបានកំណត់រហូតដល់គាត់មានអាយុ 41 ឆ្នាំ។

វីរបុរសបាល់ទាត់អាហ្សង់ទីនដែលឈ្នះពានរង្វាន់ Ballon d’Or ប្រាំបីដងធ្លាប់បាននិយាយថា Inter Miami នឹងក្លាយជាក្លឹបចុងក្រោយរបស់គាត់ ប៉ុន្តែកីឡាករវ័យ 38 ឆ្នាំរូបនេះមិនបានផ្តល់តម្រុយណាមួយអំពីការចូលនិវត្តន៍របស់គាត់ទេ ដោយនិយាយថាអាយុនឹងមិនមែនជាកត្តាកំណត់ទេ។

លោក David Beckham ដែលជាសហម្ចាស់ក្លឹប Inter Miami បាននិយាយនៅក្នុងសេចក្តីថ្លែងការណ៍មួយថា “ចក្ខុវិស័យរបស់យើងគឺនាំយកកីឡាករល្អបំផុតទៅកាន់ក្លឹប Inter Miami និងទីក្រុងនេះ ហើយនោះជាអ្វីដែលពួកយើងបានធ្វើ។ គាត់នៅតែប្តេជ្ញាដូចដែលគាត់ធ្លាប់មាន ហើយគាត់នៅតែចង់ឈ្នះ”។

Messiតារាឈ្នះពានរង្វាន់បាល់ទាត់ពិភពលោកឆ្នាំ 2022 កំពុងឈរលើគេក្នុងលីគបាល់ទាត់សហរដ្ឋអាមេរិកក្នុងការរកគ្រាប់បាល់ច្រើនរហូតដល់ 29 គ្រាប់នៅរដូវកាលនេះ ខណៈដែល Inter Miami បានបញ្ចប់ក្នុងចំណាត់ថ្នាក់លេខ 3 ។

Messi ស៊ុតបញ្ចូលទីបាន 71 គ្រាប់រួចហើយ ចាប់តាំងពីផ្ទេរពី Paris Saint-Germain ក្នុងឆ្នាំ 2023។ អំឡុងពេលនោះ អតីតកីឡាករ Barcelona លេងបាន 82 ដង បញ្ជូនបាល់ឱ្យមិត្តរួមក្រុមស៊ុតបញ្ចូលទីបាន 37 ដង ហើយសង្ឃឹមថានឹងអាចបញ្ចប់រដូវកាលដ៏លេចធ្លោមួយទៀតជាមួយនឹងពានរង្វាន់ MLS Cup ។

ពួកគេគ្រោងនឹងប្រកួតជាមួយ Nashville SC ក្នុងជុំទីមួយនៃការប្រកួតជម្រុះ MLS Cup ដែលចាប់ផ្តើមនៅថ្ងៃសុក្រ។ គាត់ត្រូវបានគេដាក់ឈ្មោះក្នុងចំណោមបេក្ខភាពចុងក្រោយចំនួនប្រាំនាក់សម្រាប់ពានរង្វាន់ MVP របស់លីគកាលពីថ្ងៃព្រហស្បតិ៍។

ការវាយតម្លៃរបស់ Miami បានកើនឡើងទ្វេដងចាប់តាំងពីឆ្នាំ 2022 ដល់ 1.2 ពាន់លានដុល្លារ នេះបើយោងតាមទស្សនាវដ្តី Forbes ដែលបានដាក់ឈ្មោះពួកគេថាជាក្រុមដែលមានតម្លៃបំផុតទីពីរនៅក្នុងក្របខណ្ឌ MLS កាលពីដើមឆ្នាំនេះ៕