ខេត្តបន្ទាយមានជ័យ៖ ទីតាំងសត្តឃាតដ្ឋានសត្វជ្រូកមួយកន្លែង ដែលបង្កជះក្លិនស្អុយរំខានដល់ការរស់នៅរបស់ប្រជាពលរដ្ឋជិតខាង ស្ថិតនៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវបានអាជ្ញាធរខេត្តបន្ទាយមានជ័យ និងមន្ត្រីជំនាញបសុពេទ្យនៃមន្ត្រីកសិកម្មខេត្ត នៅព្រឹកថ្ងៃទី២៧ ខែតុលា ឆ្នាំ២០២៥នេះ ចុះផ្អាកអាជីវកម្ម។
ក្នុងប្រតិបត្តិការនោះ ដឹកនាំដោយលោក ឃ្លោក នួយ អភិបាលរងខេត្តបន្ទាយមានជ័យ និងមានការចូលរួមពីមន្រ្តីអន្តរវិស័យមន្រ្តីការិយាល័យបសុពេទ្យ នៃមន្ទីរកសិកម្មខេត្ត អាជ្ញាធរក្រុងប៉ោយប៉ែតព្រមទាំងមានការចូលរួមពីភាគីម្ចាស់ទីសត្តឃាតផងដែរ។
បើតាមអភិបាលរងខេត្តបន្ទាយមានជ័យ លោក ឃ្លោក នួយ បានបញ្ជាក់ថា ម្ចាស់ទីតាំងត្រូវផ្អាកសកម្មភាពពិឃាត់សត្វ និងទុករយៈពេល២សប្តាហ៍ទៀតអោយរុះរើ។ ព្រោះថា អាជ្ញាប័ណ្ណនៃទីសត្តឃាតនេះបានផុតកំណត់តាំងពីឆ្នាំ២០២៤ ដោយរដ្ឋពុំបានអនុញាតអោយបន្តអាជីវកម្មលើទីតាំងខាងលើទៀតទេ។
លោកអភិបាលរងរូបនេះ បានបញ្ជាក់បន្ថែមថា មូលហេតុដែលឈានដល់ការបិទទីតាំងសត្តឃាតសត្វជ្រូកនេះ ដោយសារតែមានបណ្ដឹងពីប្រជាពលរដ្ឋដែលរងផលប៉ះពាល់ដោយសារក្លិនស្អុយ និងសំឡេងរំខាន់ដល់ពលរដ្ឋនៅជុំវិញទើបអាជ្ញាធរខេត្តសម្រេចបិទទីតាំងនេះតែម្តង។
គួរបញ្ជាក់ផងដែរថា ទីតាំងសត្តឃាតនេះ កន្លងមកនេះក៏មានធ្លាប់មាមបញ្ហាចម្រូងចម្រាសគ្នាជាមួយទីតាំងសត្តឃាតមួយទៀតលើសិទ្ធិក្នុងការប្រកបអាជីវកម្មដូចគ្នាផងដែរ៕ដោយ៖តារា
