មហាសេដ្ឋីវៀតណាមឈ្មោះ Pham Nhat Vuong បានវិនិយោគចំនួន 213 ពាន់លានដុង (8.1 លានដុល្លារអាមេរិក) ដើម្បីបើកដំណើរការក្រុមហ៊ុនអវកាសថ្មីមួយដែលមានឈ្មោះថា VinSpace ។

វានឹងដំណើរការក្នុងវិស័យចំនួនប្រាំមួយ រួមទាំងយន្តហោះ យានអវកាស និងការផលិតផ្កាយរណបទូរគមនាគមន៍ និងការដឹកជញ្ជូនតាមផ្លូវអាកាស នេះបើយោងតាមឯកសារចុះបញ្ជីរបស់ក្រុមហ៊ុន។

ក្រុមហ៊ុនថ្មីនេះមានដើមទុនធម្មនុញ្ញចំនួន 300 ពាន់លានដុង (11.4 លានដុល្លារ) ដែលក្នុងនោះលោក Vuong កាន់កាប់ 71% ។

ក្រុមហ៊ុន VinGroup របស់គាត់មានភាគហ៊ុន 19% ហើយនៅសល់គឺកាន់កាប់ដោយកូនប្រុសរបស់គាត់ Pham Nhat Quan Anh និង Pham Nhat Minh Hoang ។ Anh និង Hoang ក៏មានភាគហ៊ុនដែលមានតម្លៃរាប់ទ្រីលានដុងនៅក្នុងក្រុមហ៊ុនបុត្រសម្ព័ន្ធ VinGroup ជាច្រើនដូចជាក្រុមហ៊ុនថាមពល VinEnergo ក្រុមហ៊ុនអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន VinSpeed និងក្រុមហ៊ុនបច្ចេកវិទ្យា VinRobotics ជាដើម។

Vingroup មានគម្រោងចូលក្នុងវិស័យអាកាសចរណ៍ក្នុងឆ្នាំ 2019 ជាមួយនឹងក្រុមហ៊ុនអាកាសចរណ៍ VinPearl Air ប៉ុន្តែបានលុបចោលគម្រោងនេះនៅឆ្នាំ 2020 ដើម្បីផ្តោតលើឧស្សាហកម្មបច្ចេកវិទ្យា។ លោក Vuong ដែលជាប្រធានក្រុមហ៊ុន VinGroup និងក្រុមគ្រួសាររបស់គាត់បានចូលប្រឡូកក្នុងឧស្សាហកម្មដែក និងកម្សាន្តជាលើកដំបូងនៅក្នុងខែតុលាជាមួយ VinMetal និង V-Film ។ ពួកគេក៏បានចាប់ផ្តើមអាជីវកម្មថែទាំមនុស្សចាស់ថ្មីមួយដែលមានឈ្មោះថា Vin New Horizon ក្នុងខែដដែល។

លោក Vuong បច្ចុប្បន្នគឺជាមហាសេដ្ឋីដែលមានបំផុតនៅក្នុងប្រទេសវៀតណាម យោងតាមទស្សនាវដ្តី Forbes ដែលប៉ាន់ស្មានទ្រព្យសម្បត្តិរបស់គាត់មានចំនួន 19 ពាន់លានដុល្លារ៕