Lamine Yamal ត្រូវបានដកចេញពីក្រុមជម្រើសជាតិអេស្ប៉ាញកាលពីថ្ងៃអង្គារសម្រាប់ការប្រកួតជម្រុះ World Cup របស់ពួកគេទល់នឹងហ្សកហ្ស៊ី និងទួរគី បន្ទាប់ពីព្យាបាលរបួសក្រលៀន ដែលបង្កឱ្យមានការរិះគន់ពីសហព័ន្ធបាល់ទាត់អេស្ប៉ាញ (RFEF) ។

RFEF បាននិយាយថា ខ្សែបម្រើស្លាបរបស់ក្លឹប Barcelona វ័យ 18 ឆ្នាំ ដែលបានខកខានការប្រកួតចំនួន 5 ដងសម្រាប់ក្លឹបនៅអេស្ប៉ាញ LaLiga របស់គាត់ដោយសារតែបញ្ហានេះ មានបញ្ហាឡើងវិញកាលពីថ្ងៃចន្ទ ខណៈដែលការហ្វឹកហាត់របស់អេស្ប៉ាញបានចាប់ផ្តើម។

RFEF បាននិយាយនៅក្នុងសេចក្តីថ្លែងការណ៍មួយថា “នីតិវិធីនេះត្រូវបានអនុវត្តដោយគ្មានការជូនដំណឹងជាមុនដល់បុគ្គលិកពេទ្យរបស់ក្រុមជម្រើសជាតិដែលគ្រាន់តែដឹងពីព័ត៌មានលម្អិតតាមរយៈរបាយការណ៍ដែលបានទទួលនៅម៉ោង 10:40 យប់កាលពីយប់មិញដែលបង្ហាញពីអនុសាសន៍វេជ្ជសាស្រ្តសម្រាប់ការសម្រាករយៈពេល 7-10 ថ្ងៃ។ដោយមើលឃើញពីស្ថានភាពនេះ និងផ្តល់អាទិភាពដល់សុខភាព សុវត្ថិភាព និងសុខុមាលភាពរបស់កីឡាករគ្រប់ពេលវេលា សហព័ន្ធកីឡាបាល់ទាត់អេស្ប៉ាញបានសម្រេចចិត្តដោះលែងកីឡាករចេញពីក្រុមបច្ចុប្បន្ន”។

លោក Luis de la Fuente អ្នកចាត់ការទូទៅរបស់ក្រុមជម្រើសជាតិអេស្ប៉ាញបានពណ៌នាអំពីស្ថានភាពនេះថាជាអ្វីដែលលោកមិនបានជួបពីមុនមក។

Yamal ជាប់ជម្រើសជាតិបាន 23 ដង ស៊ុតបញ្ចូលទីបាន 6 គ្រាប់ និង បញ្ចូនបាល់ឱ្យមិត្តរួមក្រុមស៊ុតបញ្ចូលទី បាន 6 ដងក្នុង 11 ប្រកួតនៅរដូវកាលនេះសម្រាប់ Barcelona ។ អេស្ប៉ាញឈរលើគេក្នុងពូល E ដោយមាន12ពិន្ទុពីការប្ប្រកួត4លើក ដោយស៊ុតបញ្ចូលទីបាន15គ្រាប់ និងមិនរបូតមួយគ្រាប់។

ពួកគេប៉ះនឹងហ្សកហ្ស៊ីនៅថ្ងៃសៅរ៍នៅ Tbilisi មុនពេលធ្វើជាម្ចាស់ផ្ទះទួរគីនៅថ្ងៃអង្គារក្នុងទីក្រុង Seville ។ អេស្ប៉ាញនឹងមានសិទ្ធិឡើងទៅវគ្គផ្តាច់ព្រ័ត្រ ប្រសិនបើពួកគេយកឈ្នះហ្សកហ្ស៊ី ហើយទួរគីមិនឈ្នះប៊ុលហ្គារី ឬប្រសិនបើពួកគេស្មើ ហើយទួរគីចាញ់៕