ខេត្តស្ទឹងត្រែង៖ លោក សរ សុពុត្រា អភិបាល នៃគណៈអភិបាលខេត្តស្ទឹងត្រែង នៅថ្ងៃទី២៧ ខែវិច្ឆិកា ឆ្នាំ២០២៥នេះ បានឱ្យដឹងថា អាវរងាដែលជាអំណោយរបស់សប្បុរសជនជាម្ចាស់អាជីវកម្មលក់អាវនៅរាជធានីភ្នំពេញ ផ្តល់ជូនតាមរយៈលោក ប៉ក់ ណារ៉ូន ប្រធានក្រុមការងារព័ត៌មានសម្តេចតេជោ ត្រូវបានប្រគល់ជូនរដ្ឋបាលក្រុងស្រុកទាំង៦ នៃខេត្តស្ទឹងត្រែង ដើម្បីផ្តល់ជូនបន្តដល់ជនងាយរងគ្រោះនៅតាមមូលដ្ឋាន នៅសាលាខេត្តស្ទឹងត្រែង។
សូមជម្រាបជូនថា កាលពីម្សិលមិញនេះ លោក សរ សុពុត្រា ក៏បានអំពាវនាវ នាខែរងា ធ្លាក់ខ្យល់ បានឈានចូលមកដល់ហើយ សូមថែទាំសុខភាពទាំងអស់គ្នា។
លោកអភិបាលខេត្ត បានបន្តថា លោកបាននាំយកនូវអាវរងា និងឈុតខោអាវរងាចំនួន ៧១០កំផ្លេ ទៅជូនប្រជាជនចាស់ជរា គ្រួសារជនជាតិដើមភាគតិចកូវ៉ែត និងកុមារ ចំនួន ៧១០នាក់ អញ្ជើញមកពីឃុំសន្តិភាព ស្រុកសៀមប៉ាង ខេត្តស្ទឹងត្រែង។
គួរបញ្ជាក់ដែរថា កាលពីព្រឹកមិញនេះ លោក សរ សុពុត្រា បានអញ្ជើញចូលរួមក្នុងពិធីបើកការពិនិត្យ ព្យាបាល និងវះកាត់ជំងឺ (១-ក្លនលូន,២-ឆែបមាត់ ឆែបក្រអូម,៣-ប្រដាប់ភេទខុសប្រក្រតី,៤-ដុំពក,៥-ពិការអវៈយវៈពីកំណើតដោយរលាក ឬ របួស,៦-ជំងឺត្រចៀក ច្រមុះ បំពង់ក,៧-អត់មានរន្ធគូថ) ដោយឥតគិតថ្លៃ (រយៈពេល៥ថ្ងៃ) ជូនប្រជាពលរដ្ឋ និងកុមារនៅខេត្តស្ទឹងត្រែង។
រៀបចំដោយ៖ ក្រុមគ្រូពេទ្យឯកទេសនៃមន្ទីរពេទ្យកុមារជាតិ និងសម្ព័ន្ធគ្រូពេទ្យសហភាពសហព័ន្ធយុវជនកម្ពុជា
និងសហការគាំទ្រដោយ៖ រដ្ឋបាលខេត្តស្ទឹងត្រែង,មន្ទីរសុខាភិបាលនៃរដ្ឋបាលខេត្តស្ទឹងត្រែង,មន្ទីរពេទ្យខេត្តស្ទឹងត្រែង និងសហភាពសហព័ន្ធយុវជនកម្ពុជាខេត្តស្ទឹងត្រែង៕ដោយ៖តារា
