នាយកដ្ឋានពន្លត់អគ្គីភ័យហុងកុងបាននិយាយនៅព្រឹកនេះថា ជនរងគ្រោះភាគច្រើនត្រូវបានរកឃើញនៅក្នុងអគារ Wang Cheong និង Wang Tai ជាកន្លែងដែលអគ្គីភ័យកំពុងឆាបឆេះ។ នេះគឺជាអគ្គីភ័យដ៏សាហាវបំផុតនៅហុងកុងចាប់តាំងពីឆ្នាំ១៩៤៨ នៅពេលដែលការផ្ទុះ និងអគ្គីភ័យជាបន្តបន្ទាប់បានសម្លាប់មនុស្ស ១៣៥នាក់។

ក្នុងចំណោមអ្នករងរបួស ៧៦នាក់ យ៉ាងហោចណាស់ ១២នាក់នៅតែស្ថិតក្នុងស្ថានភាពធ្ងន់ធ្ងរ និង ២៨នាក់ស្ថិតក្នុងស្ថានភាពគ្រោះថ្នាក់។
នៅម៉ោងប្រហែល ៥ព្រឹក អាផាតមិនមួយនៅក្នុងអគារ Wang Tau បានឆាបឆេះម្តងទៀត។ ក្រុមពន្លត់អគ្គីភ័យបានដាក់ពង្រាយម៉ាស៊ីនបាញ់ទឹកភ្លាមៗដើម្បីបាញ់ទឹកលើភ្លើង និងបានបង្កើនភាពត្រជាក់នៃអាផាតមិនជុំវិញ។
អាជ្ញាធរហុងកុងបានព្រមានថា ចំនួនអ្នកស្លាប់អាចកើនឡើងបន្ថែមទៀត ដោយសារមនុស្ស ២៧៩នាក់នៅតែបាត់ខ្លួន។ ក្រុមពន្លត់អគ្គីភ័យបានទាក់ទងជាមួយមនុស្សមួយចំនួន ប៉ុន្តែរដ្ឋាភិបាលមិនទាន់បានធ្វើបច្ចុប្បន្នភាពតួលេខនៅឡើយទេ។
ប៉ូលីសកំពុងស្ថិតនៅមជ្ឈមណ្ឌលសហគមន៍មួយក្បែរកន្លែងកើតហេតុ ដើម្បីជួយសាច់ញាតិកំណត់អត្តសញ្ញាណជនរងគ្រោះ។ «ប្រសិនបើយើងមិនអាចកំណត់អត្តសញ្ញាណមុខមនុស្សទាំងនោះបានទេ នៅតែមានរបស់របរផ្ទាល់ខ្លួន។ ខ្ញុំមិនដឹងថាខ្ញុំមានអារម្មណ៍យ៉ាងណានៅពេលនេះទេ។ មានក្មេងៗដែលបានស្លាប់» ស្ត្រីម្នាក់ឈ្មោះ Cheung បាននិយាយនៅពេលនាងកំពុងស្វែងរកសាច់ញាតិ៕

រូប​ថត​: AFP