ខេត្តស្ទឹងត្រែង÷អនុវត្តតាមគោលការណ៍ដឹកនាំរបស់ នាយឧត្តមសេនីយ៍ ស ថេត អគ្គស្នងការនគរបាលជាតិ និងអនុវត្តតាមការណែនាំ របស់លោក សរ សុពុត្រា អភិបាល នៃគណៈអភិបាលខេត្តស្ទឹងត្រែង នៅយប់រំលងអាធ្រាត្រឈានចូលថ្ងៃទី៣០ ខែវិច្ឆិកា ឆ្នាំ២០២៥ លោកឧត្តមសេនីយ៍ទោ សារី បុត្រសត្យា ស្នងការ នៃស្នងការដ្ឋាននគរបាលខេត្តស្ទឹងត្រែង បាន ឲ្យកម្លាំងអន្តរាគមន៍ ចុះល្បាតដល់ត្រង់ចំណុចស្ថានីយប្រេង ឥន្ធនៈ(peace) ក៍បាន ប្រទះឃើញក្មេងៗចំនួន ០៣ ក្រុម កំពុងតែជួបជុំប្រមូលផ្ដុំពពាក់ពពូនគ្នា ខ្លះផឹកស៊ី ខ្លះលេងបៀរ ខ្លះអង្គុយចុចទូរស័ព្ទ ដែលទង្វើទាំងអស់នេះធ្វើឲ្យខូច និងបាត់បង់សណ្ដាប់ធ្នាប់សាធារណៈនៅពេលយប់ (បង្ករការភ័យខ្លាចដល់ប្រជាពលរដ្ឋ)។
ពេលនោះកម្លាំងជំនាញបាន ប្រមូលក្មេងៗទាំងអស់នោះសរុបមានចំនួន ២៤នាក់ ស្រីចំនួន ០៤នាក់ មកស្នងការដ្ឋាននគរបាលខេត្តស្ទឹងត្រែង ដើម្បីសាកសួរ ។ កម្លាំងជំនាញពិនិត្យឃើញថាក្រុមក្មេងទាំងអស់ខាងលើ មកពីតាមបណ្ដាស្រុក-ក្រុង៤(ថាឡា-សេសា- អូរស្វាយ និងក្រុង) កម្លាំងជំនាញបានធ្វើតេស្តស្វែងរកសារធាតុញៀន ជាលទ្ធផល មានដូចខាងក្រោម៖
វិជ្ជមាន ចំនួន០៤នាក់(ប្រុស)និងអវិជ្ជមាន ចំនួន២០ នាក់ ស្រី០៤នាក់។ ចំពោះអ្នកគ្មានផ្ទុកសារធាតុញៀន កម្លាំងជំនាញបានធ្វើកិច្ចសន្យាអប់រំ និងបានប្រគល់ទៅឲ្យអាណាព្យាបាលមកធានា ត្រឡប់ទៅលំនៅដ្ឋានវិញ។
ដោយឡែកអ្នកមានផ្ទុកសារធាតុញៀនទាំង៤នាក់ (ប្រុស) កម្លាំងជំនាញកំពុងអនុវត្តនីតិវិធីបន្ត ។
ស្នងការដ្ឋាននគរបាលខេត្ត ក៏សូមសំណូមពរ៖
១-ស្នើសុំឲ្យអាណាព្យាបាល សូមធ្វើការណែនាំ អប់រំ កូនរបស់ខ្លួនឲ្យបានល្អ និងចូលរួមគ្រប់សកម្មភាពជាមួយសមត្ថកិច្ច ។
២-បើបងប្អូនប្រជាពលរដ្ឋទទួលបានព័ត៌មាន ឬដំណឹងពាក់ព័ន្ធក្មេង ទំនើង ធ្វើសកម្មភាពផ្សេងៗ សូមរាយការណ៍មកទូរស័ព្ទប្រចាំបញ្ជា ស្នងការដ្ឋាននគរបាលខេត្ត ដែលមានលេខ (0977780021)។
៣-រាល់ការរាយការណ៍របស់បងប្អូនប្រជាពលរដ្ឋយើង គឺធានាលាក់ការសម្ងាត់ជូន ដើម្បីលុបបំបាត់ក្មេងទំនើងនៅក្នុងមូលដ្ឋាន៕
