ខេត្តស្ទឹងត្រែង ៖ សហគមន៍នេសាទកាំងដីសបានសហការគ្នាចុះបង្ក្រាបបទល្មើសនេសាទខុសច្បាប់ ដោយបានដេញចាប់បានទូកស្មាច់១គ្រឿង រួមជាមួយសម្ភារឆក់ត្រីជាច្រើនកាលពីរំលងអធ្រាត្រ ឈានចូលថ្ងៃទី១៨ ខែធ្នូ ឆ្នាំ២០២៥ ។ ហេតុការណ៍នេះ កើតឡើងក្នុងភូមិសាស្ត្រស្រុកថាឡាបរិវ៉ាត់ ខេត្តស្ទឹងត្រែង ។
យោងតាមការបញ្ជាក់ពីសមាជិកសហគមន៍នេសាទ ដែលបានចុះប្រតិបត្តិការផ្ទាល់ បានឱ្យដឹងថា ពួកគេបានចុះល្បាតនៅចំណុចភូមិវាខ្សាច់ ស្រុកថាឡាបរិវ៉ាត់ ដើម្បីបង្ក្រាបសកម្មភាពនេសាទដោយឧបករណ៍ឆក់ ដែលកំពុងតែកើតឡើង និងបង្កផលប៉ះពាល់យ៉ាង ធ្ងន់ធ្ងរដល់ធនធានត្រីក្នុងដងទន្លេ ។
ក្នុងពេលចុះល្បាតនោះ ក្រុមការងារសហគមន៍បានប្រទះឃើញសកម្មភាពបទល្មើសជាក់ស្តែង ហើយបានដេញចាប់រហូតទទួលបានលទ្ធផលជោគជ័យ ដោយបានដកហូតវត្ថុតាងមួយចំនួនធំ រួមមាន៖ទូកស្មាច់ចំនួន១គ្រឿង, ម៉ាស៊ីនអ៊ីណូតា២៥សេសចំនួន១គ្រឿង, អាំងម៉ូទ័រឆក់ចំនួន២គ្រឿង (ក្តៅ១គ្រឿង និងត្រជាក់១គ្រឿង), ថ្នងដងត្រីចំនួន១ខ្សែកាប ចំនួន៥ម៉ែត្រ, ខ្សែភ្លើងចំនួន៥ម៉ែត្រ ។
ទោះជាយ៉ាងណា ជនសង្ស័យដែលប្រព្រឹត្តបទល្មើសបានរត់គេចខ្លួនបាត់ស្រមោល ខណៈដែលកម្លាំងសហគមន៍កំពុងព្យាយាមចូលទៅចាប់ខ្លួន ។ សមាជិកសហគមន៍នេសាទបានសង្កត់ធ្ងន់ថា ទោះបីជាប្រតិបត្តិការនេះ មានគ្រោះថ្នាក់យ៉ាងណាក្តី ក៏ពួកគេនៅតែមានឆន្ទៈខ្ពស់និងសាមគ្គីគ្នា ដើម្បីបន្តចុះបង្ក្រាបបទល្មើសនេសាទខុសច្បាប់ទាំងឡាយ ដើម្បី រក្សាផលត្រីឱ្យនៅគង់វង្សតជំនាន់ ។
ពួកគេបានអះអាងថា នឹងមិនខ្លាចរអារ ឬញញើតចំពោះបេសកកម្មល្បាត និងទប់ស្កាត់បទល្មើសនៅលើផ្ទៃទឹកនោះឡើយ ៕
