សេតវិមានបានប្រកាសថា ប្រធានាធិបតីអាមេរិក ដូណាល់ ត្រាំ បានជួបសន្ទនាតាមទូរស័ព្ទ «វិជ្ជមាន» ជាមួយសមភាគីរុស្ស៊ី វ្ល៉ាឌីមៀរ ពូទីន នៅថ្ងៃទី២៩ ខែធ្នូ ទាក់ទងនឹងជម្លោះអ៊ុយក្រែន។ ការសន្ទនានេះបានកើតឡើងមួយថ្ងៃបន្ទាប់ពីប្រធានាធិបតី ត្រាំ បានជួបជាមួយសមភាគីអ៊ុយក្រែន លោក ហ្សេលេនស្គី នៅរដ្ឋផ្លរីដា។

អ្នកនាំពាក្យសេតវិមាន លោកស្រី ខារ៉ូលីន លេវីត បានសរសេរនៅលើបណ្តាញសង្គមថា «ប្រធានាធិបតី ត្រាំ បានបញ្ចប់ការសន្ទនាតាមទូរស័ព្ទវិជ្ជមានជាមួយប្រធានាធិបតី ពូទីន ទាក់ទងនឹងអ៊ុយក្រែន»។ យោងតាមលោក លេវីត ប្រធានាធិបតី ត្រាំ និងប្រធានាធិបតី ពូទីន ក៏បាននិយាយគ្នាមុនកិច្ចប្រជុំរបស់លោក ត្រាំ ជាមួយលោក ហ្សេលេនស្គី នៅថ្ងៃទី២៨ ខែធ្នូ។
ការប្រកាសរបស់លោក លេវីត បានកើតឡើងភ្លាមៗបន្ទាប់ពីទីក្រុងមូស្គូ បានចោទប្រកាន់ទីក្រុងគៀវ ពីបទបាញ់យន្តហោះគ្មានមនុស្សបើក ដែលកំណត់គោលដៅលើលំនៅដ្ឋានរបស់ប្រធានាធិបតី ពូទីន នៅក្នុងខេត្តណូវ៉ូហ្គោដ ហើយបានប្រកាសថា ខ្លួននឹង «កែសម្រួល» ជំហរចរចារបស់រុស្ស៊ី លើការបញ្ចប់ជម្លោះអ៊ុយក្រែន។ ការចោទប្រកាន់នេះត្រូវបានបដិសេធដោយប្រធានាធិបតី ហ្សេលេនស្គី៕

រូបថត​: TTXVN