នៅមុនពេលចាប់ខ្លួនប្រធានាធិបតី វេណេហ្ស៊ុយអេឡា អាមេរិក បានព្រមានទៅកាន់ប្រទេសអ៊ីរ៉ង់ ពាក់ព័ន្ធនឹងការប្រើហិង្សាទៅលើក្រុមបាតុករបណ្តាលអោយមានបាតុករស្លាប់និងរបួស ។

រដ្ឋាភិបាលទីក្រុងតេអេរ៉ងបានថ្កោលទោសការជ្រៀតជ្រែករបស់សហរដ្ឋអាមេរិកក្នុងកិច្ចការផ្ទៃក្នុង និងព្រមានពីការឆ្លើយតបយ៉ាងម៉ឺងម៉ាត់ចំពោះទង្វើឈ្លានពានណាមួយ។
ក្រសួងការបរទេសអ៊ីរ៉ង់បានចេញសេចក្តីថ្លែងការណ៍មួយទាក់ទងនឹងការជ្រៀតជ្រែករបស់មន្ត្រីអាមេរិកក្នុងកិច្ចការផ្ទៃក្នុងរបស់អ៊ីរ៉ង់។ សេចក្តីថ្លែងការណ៍នេះបានថ្កោលទោសយ៉ាងខ្លាំងចំពោះប្រធានាធិបតីអាមេរិក និងមន្ត្រីអាមេរិកដទៃទៀតចំពោះការធ្វើសេចក្តីថ្លែងការណ៍ជ្រៀតជ្រែកលើកិច្ចការផ្ទៃក្នុងរបស់អ៊ីរ៉ង់ ដោយបញ្ជាក់ថាជំហរមិនទទួលខុសត្រូវនេះគឺជាការបន្តនៃការគំរាមកំហែង និងសកម្មភាពខុសច្បាប់ដែលសហរដ្ឋអាមេរិកបានធ្វើឡើងប្រឆាំងនឹងអ៊ីរ៉ង់។
ក្រសួងការបរទេសអ៊ីរ៉ង់បានប្រកាសថា សេចក្តីថ្លែងការណ៍របស់សហរដ្ឋអាមេរិកមិនត្រឹមតែរំលោភយ៉ាងធ្ងន់ធ្ងរលើគោលការណ៍ជាមូលដ្ឋាននៃធម្មនុញ្ញអង្គការសហប្រជាជាតិ និងច្បាប់អន្តរជាតិទាក់ទងនឹងការគោរពអធិបតេយ្យភាពជាតិប៉ុណ្ណោះទេ ប៉ុន្តែថែមទាំងញុះញង់អំពើហិង្សា និងភេរវកម្មប្រឆាំងនឹងប្រជាជនអ៊ីរ៉ង់ផងដែរ។
សារដ៏ម៉ឺងម៉ាត់របស់ប្រធានាធិបតីអាមេរិក ដូណាល់ ត្រាំ ទៅកាន់អ៊ីរ៉ង់នៅថ្ងៃទី 2 ខែមករា ឆ្នាំ 2026 បានបញ្ជាក់ថា សហរដ្ឋអាមេរិកបានកំណត់គោលដៅរបស់ខ្លួន ហើយត្រៀមខ្លួនរួចជាស្រេចដើម្បីធ្វើសកម្មភាព ប្រសិនបើអ៊ីរ៉ង់បាញ់ទៅលើក្រុមបាតុករ។
ក្រុមអ្នកវិភាគបានលើកឡើងថា សកម្មភាពរបស់អាមេរិក ចូលទៅចាប់ខ្លួនប្រធានាធិបតី វេណេហ្ស៊ុយអេឡាដល់ផ្ទះ គឺជាសារព្រមានមួយទៅកាន់ប្រទេសអីរ៉ង់ ថា គ្មានអ្វីដែលអាមេរិកធ្វើមិនបាននោះឡើយ ៕

រូប​ថត​: thanhhoa