ក្លឹប Manchester United បានប្រកាសកាលពីថ្ងៃព្រហស្បតិ៍ថា ខ្សែបម្រើ Casemiro នឹងចាកចេញពីក្រុមនៅអង់គ្លេស Premier League នៅចុងបញ្ចប់នៃរដូវកាលនេះ ពេលដែលកិច្ចសន្យារបស់គាត់ផុតកំណត់។

កីឡាករវ័យ 33 ឆ្នាំរូបនេះមានជម្រើសបន្ថែមរយៈពេល 1 ឆ្នាំ ប៉ុន្តែក្លឹបបានសម្រេចមិនបន្តកុងត្រាថ្មីជាមួយគាត់ ហើយ Casemiro បានស្នើសុំឱ្យក្លឹបបញ្ជាក់ពីការចាកចេញនៅរដូវក្តៅរបស់គាត់នៅពេលនេះ។

Casemiro បាននិយាយថា “ខ្ញុំនឹងនៅតែចងចាំក្លឹប Manchester United ពេញមួយជីវិតរបស់ខ្ញុំ។ ចាប់តាំងពីថ្ងៃដំបូងដែលខ្ញុំបានដើរចេញមកបង្ហាញខ្លួននៅកីឡដ្ឋានដ៏ស្រស់ស្អាតនេះ ខ្ញុំមានអារម្មណ៍ថាមានចិត្តស្រលាញ់ Old Trafford លើសលប់ដែលខ្ញុំបានចែករំលែកជាមួយអ្នកគាំទ្ររបស់យើងនៃក្លឹបពិសេសនេះ។”

កីឡាករប្រេស៊ីលនេះបានមកដល់កីឡាដ្ឋាន Old Trafford ក្នុងខែសីហាឆ្នាំ 2022 ដោយផ្លាស់ចេញពី Real Madrid ក្នុងតម្លៃប្រហែល 60 លានផោន (80.90 លានដុល្លារ) ហើយម្ចាស់ជើងឯក Champions League ប្រាំសម័យបានក្លាយជាផ្នែកសំខាន់នៃបំបន់បម្រើរបស់ក្រុមបិសាចក្រហមដោយស៊ុតបញ្ចូលទីបាន 21 គ្រាប់ក្នុងចំណោម 146 ប្រកួត។

Casemiro បានដើរតួយ៉ាងសំខាន់ក្នុងការជួយ United ឈ្នះពានរង្វាន់ League Cup ឆ្នាំ 2023 ដោយស៊ុតបញ្ចូលទីនាំមុខក្នុងជ័យជម្នះ 2-0 របស់ពួកគេលើក្រុម Newcastle United នៅវគ្គផ្តាច់ព្រ័ត្រ។ គាត់ក៏ជាផ្នែកមួយនៃក្រុមដែលឈ្នះ FA Cup របស់ United ក្នុងឆ្នាំ 2024៕