តារាម៉ូដែលចិន Moka Fang អាយុ ៣៩ ឆ្នាំ ដែលជាភរិយារបស់តារាចម្រៀងដ៏ល្បី Aaron Kwok អាយុ ៦១ ឆ្នាំ បានចែករំលែកវីដេអូ vlog មួយ បង្ហាញពីការទៅទិញមាសជាកាដូសម្រាប់កូនស្រីទាំងបីរបស់នាង។

តាមសារព័ត៌មាន Dimsum Daily Fang បានបង្ហោះព័ត៍មានថ្មីៗអំពីជីវិតប្រចាំថ្ងៃរបស់នាងលើបណ្ដាញសង្គមជាញឹកញាប់ក្នុងប៉ុន្មានឆ្នាំចុងក្រោយនេះ។ ក្នុងវីដេអូមួយដែលបានបង្ហោះនៅថ្ងៃទី ៤ ខែមករា និងថតនៅពិធីបើកហាងគ្រឿងអលង្ការមាសមួយនៅទីក្រុងសៀងហៃ នាងបានបង្ហាញខ្លួនក្នុងឈុតពណ៌មាសស្រាលដូចស្រាសំប៉ាញ ជាមួយការតុបតែងមុខ និងគ្រឿងអលង្ការដែលរៀបចំយ៉ាងម៉ត់ចត់ ហើយកាន់កាបូប Hermès Mini Kelly ពណ៌ខ្មៅមួយ។

ក្នុងវីដេអូ នាងត្រូវបានបុគ្គលិកហាងស្វាគមន៍យ៉ាងកក់ក្តៅ និងនាំឲ្យសាកល្បងគ្រឿងមាសជាច្រើនប្រភេទ។

Fang បានប្រាប់បុគ្គលិកហាងថា នាងចូលចិត្តរចនាបថសាមញ្ញ និងអាចប្រើបានក្នុងជីវិតប្រចាំថ្ងៃ ហើយបានជ្រើសរើសគ្រឿងមាសមួយដែលមានរូបក្តាម ដើម្បីផ្តល់ជាអំណោយដល់ “ទ្រព្យសម្បត្តិបី” របស់នាង គឺសំដៅទៅលើកូនស្រីទាំងបី។ វីដេអូបន្តបង្ហាញឲ្យឃើញនាងបញ្ចប់ការទិញ និងចាកចេញពីហាង ដោយមានបុគ្គលិកកាន់ថង់ទំនិញធំៗចំនួនបីឲ្យនាង។

ទោះបី Fang មិនបានបង្ហាញច្បាស់ពីតម្លៃសរុប ឬវត្ថុដែលបានទិញក៏ដោយ អ្នកមើលវីដេអូជាច្រើនបានលើកឡើងថា ចំនួនគ្រឿងមាសដែលនាងបានពិនិត្យមើល បង្ហាញថា នេះជាការចំណាយធំមួយ ជាពិសេសនៅពេលដែលតម្លៃមាសកំពុងនៅជិតកម្រិតខ្ពស់បំផុតក្នុងប្រវត្តិសាស្ត្រ។

សារព័ត៌មានក្នុងស្រុករាយការណ៍ថា Fang មកពីគ្រួសារដែលមានជីវភាពធម្មតា ហើយឪពុកម្តាយរបស់នាងអាចផ្លាស់ទៅរស់នៅក្នុងទីក្រុង និងទិញរថយន្តបាន ក្រោយពីនាងរៀបការជាមួយ Kwok ប៉ុណ្ណោះ។

Aaron Kwok បានចាប់ផ្តើមអាជីពក្នុងវិស័យកម្សាន្តជាអ្នករាំដែលបានបណ្តុះបណ្តាល មុនពេលពង្រីកទៅកាន់ការច្រៀង និងសម្ដែង ហើយក្រោយមកបានក្លាយជាជនល្បីមួយក្នុងចំណោម “ស្តេចមេឃទាំងបួន” របស់ហុងកុង រួមជាមួយ Jacky Cheung, Andy Lau និង Leon Lai។

ក្នុងឆ្នាំ ២០២១ សារព័ត៌មាន South China Morning Post បានប៉ាន់ប្រមាណថា ទ្រព្យសម្បត្តិសុទ្ធរបស់គាត់មានប្រហែល ២០ លានដុល្លារអាមេរិក៕