តារាប្រណាំងរថយន្ត Formula 1 របស់ចក្រភពអង់គ្លេស Sir Lewis Hamilton និងតារាមហាសេដ្ឋីអាមេរិក  Kim Kardashian ត្រូវបានរាយការណ៍ថា កំពុងស្ថិតនៅដំណាក់កាលដំបូងនៃទំនាក់ទំនងស្នេហាដែលរក្សាជាការសម្ងាត់ បន្ទាប់ពីការធ្វើដំណើរកម្សាន្តប្រណិតមួយនៅតំបន់ជនបទអង់គ្លេស។

យោងតាមសារព័ត៌មានអង់គ្លេស Kardashian បានធ្វើដំណើរទៅចក្រភពអង់គ្លេសកាលពីចុងសប្តាហ៍មុន ដោយមានគោលបំណងជួប Hamilton ជាពិសេស។ ទោះបីការស្នាក់នៅមានរយៈពេលប្រហែលតែ ២៤ ម៉ោងប៉ុណ្ណោះ ក៏ដោយ ប៉ុន្តែបទពិសោធន៍នោះពោរពេញទៅដោយអារម្មណ៍រ៉ូមែនទិក។ Kardashian បានចុះចតនៅព្រលានយន្តហោះ Oxford ដោយយន្តហោះឯកជន មុននឹងធ្វើដំណើរទៅ Estelle Manor ដែលជាក្លឹប និងសណ្ឋាគារប្រណិតនៅជនបទ ដែលពេញនិយមក្នុងចំណោមអ្នកមានឥទ្ធិពលខ្ពស់។

Hamilton បានមកដល់ប្រហែលមួយម៉ោងបន្ទាប់ ដោយហោះមកពីទីក្រុងឡុងដ៍តាមឧទ្ធម្ភាគចក្រ។ ប្រភពព័ត៌មានអះអាងថា អ្នកទាំងពីរបានទទួលទានអាហារពេលល្ងាចឯកជន និងសេវាម៉ាស្សា មុននឹងស្នាក់នៅយប់មួយក្នុងបន្ទប់តែមួយ។

សាក្សីបានពិពណ៌នាបរិយាកាសរវាងពួកគេថា «រ៉ូមែនទិកខ្លាំងណាស់» ខណៈដែលអង្គរក្សបាននៅឆ្ងាយពីពួកគេ។

នៅព្រឹកថ្ងៃអាទិត្យ Hamilton បានចាកចេញតាមច្រកចូលធំ ខណៈ Kardashian ត្រូវបាននាំចេញតាមច្រកខាងក្រោយ។ ទោះយ៉ាងណា ការព្យាយាមចាកចេញដោយស្ងៀមស្ងាត់របស់នាង ត្រូវបានគេសម្គាល់ដោយវ៉ាលីជាច្រើន — សរុបមាន ៨ កាបូបធំ ដែលមានអក្សរឈ្មោះនាងបោះពុម្ពលើវា។

សារព័ត៌មាន Daily Mail ប៉ាន់ស្មានថា ចំណាយសរុបសម្រាប់ការជួបជុំរយៈពេល ២៤ ម៉ោងនេះ រួមទាំងកន្លែងស្នាក់នៅ ការធ្វើដំណើរ និងសេវាស្ប៉ា អាចឡើងដល់ ១២០,០០០ ផោន (ប្រហែល ១៦៤,០០០ ដុល្លារអាមេរិក)។ តំណាងរបស់តារាទាំងពីរនៅមិនទាន់មានមតិយោបល់លើព័ត៌មាននេះនៅឡើយទេ។

Hamilton ក៏ត្រូវបានពាក្យចចាមអារ៉ាមថា កំពុងណាត់ជួបតារាល្បីជាច្រើនរូប ប៉ុន្តែមិនបានបញ្ជាក់អំពីទំនាក់ទំនងថ្មីណាមួយឡើយ។

Hamilton អាយុ ៤១ ឆ្នាំ មានកំណត់ត្រាជាម្ចាស់ជើងឯក Formula 1 ច្រើនបំផុត (៧ ដង) ស្មើ Michael Schumacher និងមានឥទ្ធិពលខ្លាំងក្នុងវិស័យម៉ូដ និងសកម្មភាពសង្គម។ លោកត្រូវបានផ្តល់គោរមងារជា “Sir” ក្នុងឆ្នាំ ២០២១។

Kardashian អាយុ ៤៥ ឆ្នាំ បានផ្លាស់ប្តូរពីតារាទូរទស្សន៍ ទៅជាស្ត្រីជំនួញមហាសេដ្ឋី ជាស្ថាបនិកក្រុមហ៊ុនសម្លៀកបំពាក់ SKIMS។

យោងតាម Forbes ទ្រព្យសម្បត្តិសរុបរបស់នាងបច្ចុប្បន្នមានប្រមាណ ១,៩ ពាន់លានដុល្លារ។ នាងមានអ្នកតាមដានលើ Instagram ជាង ៣៥៤ លាននាក់ ហើយមានកូន ៤ នាក់ជាមួយអតីតស្វាមី Kanye West ដែលបានលែងលះគ្នាក្នុងឆ្នាំ ២០២២៕