Yang Lijuan ដែលធ្លាប់ជាបុគ្គលិកបម្រើនៅភោជនីយដ្ឋានហត់ផត Haidilao បានឡើងតំណែងជាបន្តបន្ទាប់រហូតក្លាយជានាយកប្រតិបត្តិ (CEO) មុនពេលបន្តទៅកាន់តួនាទីកំពូលក្នុងអាជីវកម្មអន្តរជាតិរបស់ក្រុមហ៊ុន។

បច្ចុប្បន្ន លោកស្រីបម្រើការជា CEO នៃក្រុមហ៊ុន Super Hi ដែលគ្រប់គ្រងភោជនីយដ្ឋាន Haidilao នៅក្រៅប្រទេសចិន។

មុននេះ លោកស្រីធ្លាប់ដឹកនាំក្រុមហ៊ុនមេក្នុងឆ្នាំ 2022 បន្ទាប់ពីសហស្ថាបនិក Zhang Yong លាលែងពីតួនាទី CEO។

Haidilao ដែលមានន័យថា “កៀបពីបាតសមុទ្រ” គឺជាម៉ាកម្ហូបចិនដ៏ពេញនិយមមួយលើពិភពលោក មានសាខាសរុប 1,363 កន្លែង នៅក្នុង និងក្រៅប្រទេសចិន គិតត្រឹមចុងខែមិថុនាឆ្នាំមុន។

Yang កើតឆ្នាំ 1978 នៅខេត្តស៊ីឈួន ភាគនិរតីប្រទេសចិន។ គាត់បានបោះបង់ការសិក្សាតាំងពីអាយុ 16 ឆ្នាំ ដោយសារបំណុលធ្ងន់ធ្ងររបស់បងប្រុសពីរនាក់ ហើយចូលធ្វើការនៅពេលដែលមិត្តរួមវ័យនៅតែបន្តសិក្សា។

គាត់បានចូលធ្វើការនៅ Haidilao នៅពេលវានៅតែជាអាជីវកម្មតូចមួយក្នុងតំបន់ ដោយធ្វើការពេញមួយថ្ងៃ ចាក់ទឹកស៊ុបថែរក្សាកុមារ អ្នកទទួលភ្ញៀវ សម្អាត និងសូម្បីតែសម្អាតស្បែកជើង។

លោកស្រីបាននឹកឃើញថា ខ្លួន “គ្មានជម្រើស” ប៉ុន្តែការងារនេះបានបង្កើតវិន័យការងារដល់លោកស្រី។

ឆ្នាំដំបូងក៏ពិបាកផ្នែកហិរញ្ញវត្ថុ ដោយម្ចាស់បំណុលមកទាមទារប្រាក់ជាញឹកញាប់។ ទោះយ៉ាងណា Zhang Yong បានជួយដោយផ្តល់ប្រាក់ 800 យ័ន ដែលប្រហែលទ្វេដងនៃប្រាក់ខែមធ្យមនៅពេលនោះ ហើយសកម្មភាពនេះបានធ្វើឱ្យលោកស្រីសម្រេចនៅជាមួយ Haidilao រយៈពេលវែង។

អាជីពរបស់គាត់បានរីកចម្រើនជាមួយការពង្រីកម៉ាក។ លោកស្រីក្លាយជាអ្នកគ្រប់គ្រងសាខានៅអាយុ 19 ឆ្នាំ ហើយពីរឆ្នាំបន្ទាប់ ត្រូវបានផ្ដល់ភារកិច្ចបើកសាខាដំបូងក្រៅស៊ីឈួន នៅទីក្រុងស៊ីអាន។

គាត់គ្រប់គ្រងភោជនីយដ្ឋានពេលថ្ងៃ និងសិក្សាគ្រប់គ្រងបុគ្គលិក អ្នកផ្គត់ផ្គង់ និងការដោះស្រាយបញ្ហាអតិថិជនពេលយប់។ ក្នុងរយៈពេលមួយឆ្នាំ សាខានេះក្លាយជាសាខាមួយក្នុងចំណោមសាខាដែលមានប្រសិទ្ធភាពខ្ពស់បំផុត។

សារព័ត៌មានចិនរាយការណ៍ថា ឆ្នាំ 1999 មានមនុស្សប្រហែល 60 នាក់មានអាវុធ មកបង្កហេតុនៅយប់មួយ ប៉ុន្តែលោកស្រីបានឈរមុខការពារបុគ្គលិក ជំនួសការរត់គេច។ ហេតុនេះក្លាយជាគំរូនៃរចនាប័ទ្មដឹកនាំរឹងមាំរបស់គាត់។

នៅឆ្នាំ 2012 ពេល Haidilao ចាប់ផ្តើមពង្រីកទៅទីផ្សារបរទេស លោកស្រីត្រូវបានដាក់ឱ្យគ្រប់គ្រងប្រតិបត្តិការទាំងមូល ហើយដឹកនាំការចូលទៅសិង្ហបុរី និងសហរដ្ឋអាមេរិក ដោយធ្វើដំណើរត្រួតពិនិត្យខ្សែផ្គត់ផ្គង់ សិក្សាចំណង់ចំណូលចិត្តអតិថិជន និងកែប្រែសេវាកម្មឱ្យសមនឹងទីផ្សារ។

Haidilao បានចុះបញ្ជីលក់ភាគហ៊ុននៅហុងកុងឆ្នាំ 2018 ហើយ Yang កាន់កាប់ភាគហ៊ុនប្រហែល 3.68% មានតម្លៃជិត 3 ពាន់លានយ័ន នៅពេលនោះ។ បន្ទាប់ពីធ្វើការជាមួយម៉ាកយីហោរយៈពេល 24 ឆ្នាំ លោកស្រីបានក្លាយពីបុគ្គលិកប្រាក់ខែ 80 យ័ន/ខែ ទៅជាស្ត្រីជោគជ័យបង្កើតទ្រព្យសម្បត្តិដោយខ្លួនឯង។

បញ្ជីអ្នកមាន Hurun បានដាក់លោកស្រីក្នុងចំណោមស្ត្រីបង្កើតទ្រព្យសម្បត្តិដោយខ្លួនឯងមានបំផុត 50 នាក់លើពិភពលោក និងចាត់ថ្នាក់លេខ 7 ក្នុងចំណោមអ្នកគ្រប់គ្រងអាជីពមានទ្រព្យសម្បត្តិខ្ពស់បំផុតនៅចិន ឆ្នាំ 2021។

លោកស្រីមិនសូវប្រើពាក្យលើកទឹកចិត្តធំៗទេ ហើយជឿថាជោគជ័យមកពី ការអត់ធ្មត់ ការបន្តប្រឹងប្រែង និងការចាប់យកឱកាស ទោះមានការអប់រំផ្លូវការមិនច្រើនក៏ដោយ៕