ខេត្តកំពង់ស្ពឺ ៖ នៅចំណុចតារាងបាល់ទះក្នុងភូមិកាន់តម្រា ឃុំជង្រុក ស្រុកគងពិសី ខេត្តកំពង់ស្ពឺ មានករណីចោរកម្មបាត់ម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០២៥ ពាក់ផ្លាកលេខស្ទឹងត្រែង1A-7028 ពេលម្ចាស់ទុកម៉ូតូក្បែរតារាងបាល់ទះដោយម្ចាស់ជាប់ដៃលេងបាល់ភ្លេចដកកូនសោចេញពីម៉ូតូ ។
ដោយបានការបញ្ជាដឹកនាំពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ និងការណែនាំពីលោកស្នងការរងផែនការងារនគរបាលព្រហ្មទណ្ឌខេត្ដ កម្លាំងអធិការដ្ឋាននគរបាលស្រុកគងពិសី ដឹកនាំផ្ទាល់ដោយលោកវរសេនីយ៍ឯក យ៉ាង សុខលី អធិការនគរបាលស្រុកគងពិសី បានសហការធ្វេីការស្រាវជ្រាវរហូតឈានទៅកំណត់បានមុខសញ្ញាជនសង្ស័យជាចោរលួចម៉ូតូខាងលេី នៅថ្ងៃទី១៨ ខែកុម្ភៈ ឆ្នាំ ២០២៦ ដោយសមត្ថកិច្ចបានឃាត់ខ្លួនឈ្មោះ មួយ ស្រីឆេង ភេទស្រី អាយុ៣៨ឆ្នាំ រស់នៅភូមិក្រាំងគ្រួស ឃុំស្នំក្រពើ ស្រុកគងពិសី ខេត្តកំពង់ស្ពឺ យកមកសួរនាំ និងបានដកហូតម៉ូតូ១គ្រឿងរបស់ជនរងគ្រោះត្រឡប់មកវិញ។
នៅចំពោះមុខសមត្ថកិច្ចនគរបាល ជនសង្ស័យឈ្មោះ មួយ ស្រីឆេង បានឆ្លើយសារភាពថា ខ្លួនពិតជាបានធ្វើ
សកម្មភាពលួចម៉ូតូរបស់ជនរងគ្រោះប្រាកដមែន ដោយសារតែភាពអំណោយផលនៃវត្ថុលួចមានសោនៅ
ជាប់នឹងម៉ូតូ ហេីយម្ចាស់កំពុងតែវីវក់នឹងការលេងកីឡាបាល់ទះភ្នាល់គ្នា។
ដោយទទួលបានការអនុញ្ញាតពីតំណាងអយ្យការ សមត្ថកិច្ចជំនាញបានប្រគល់វត្តុតាងម៉ូតូជូនជនរងគ្រោះជាម្ចាស់ប្រេីប្រាស់វិញនិងបានឃាត់ខ្លួនចោរស្រីដៃឆេីតបញ្ជូនមកអធិការដ្ឋាននគរបាលស្រុកគងពិសីដើម្បីកសាងសំណុំរឿងចាត់ការតាមនីតិវិធី៕
