ខេត្តកំពង់ស្ពឺ÷ កម្លាំងមន្ទីរស្រាវជ្រាវនិងបង្ក្រាបបទល្មេីស នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ សហការជាមួយកម្លាំងមូលដ្ឋានកងរាជអាវុធហត្ថក្រុងច្បារមន បង្ក្រាបនិងឃាត់ខ្លួនជនសង្ស័យបាន២នាក់ បញ្ជូនទៅសាលាដំបូងខេត្តកំពង់ស្ពឺពាក់ព័ន្ធករណីគ្រឿងញៀន។
ដោយអនុវត្តតាមការចង្អុលបង្ហាញរបស់នាយឧត្ដម សេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងមានការណែនាំផ្ទាល់ពីសំណាក់ លោក ជាម ច័ន្ទសោភ័ណ្ឌ អភិបាលនៃគណៈអភិបាលខេត្តកំពង់ស្ពឺ ក្រោមការដឹកនាំបញ្ជាដោយផ្ទាល់យ៉ាងមុឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ និងមានការសម្រប សម្រួលនីតិវិធីពី ព្រះរាជអាជ្ញា អមសាលាដំបូងខេត្តកំពង់ស្ពឺឃាត់ខ្លួនជនសង្ស័យបាន២នាក់។
វេលាម៉ោង១២និង២២នាទីរសៀល នាថ្ងៃទី២១ ខែកុម្ភៈ ឆ្នាំ២០២៦កន្លងមកកម្លាំងមន្ទីរស្រាវជ្រាវនិងបង្ក្រាបបទល្មេីស នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ សហការជាមួយកម្លាំងមូលដ្ឋានកងរាជអាវុធហត្ថក្រុងច្បារមនដឹកនាំដោយលោកអនុសេនីយ៍ទោ សេង សារ៉ាន មេបញ្ជាការរង មូលដ្ឋានកងរាជអាវុធហត្ថក្រុងច្បារមន បានបើកប្រតិបត្តិការបង្ក្រាបជាក់ស្តែងនិងឈានដល់ការឃាត់ខ្លួនជនសង្ស័យបាន១នាក់ ជាប់ពាក់ករណីគ្រឿងញៀន ស្ថិតនៅភូមិថ្លុករាំង ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ។ ជនសង្ស័យមានឈ្មោះ យ៉ាន បញ្ញាឫទ្ធិ ភេទប្រុស អាយុ១៨ឆ្នាំ មុខរបរមិនពិតប្រាកដ មានទីលំនៅបច្ចុប្បន្នភូមិទួលកេះ ឃុំក្រាំងចេក ស្រុកសាមគ្គីមុន្នីជ័យ ខេត្តកំពង់ស្ពឺ។
ក្រោមវិធានជំនាញរបស់កងរាជអាវុធហត្ថខេត្តកំពង់ស្ពឺ លុះដល់វេលាម៉ោង១៣:៥៨នាទីរសៀល នាថ្ងៃ.ខែ.ឆ្នាំដដែលនេះផងដែរ កម្លាំងជំនាញកងរាជអាវុធហត្ថខេត្តកំពង់ស្ពឺ បន្តសហការកំណត់មុខសញ្ញា និងឈានដល់ការឃាត់ខ្លួនបានជនសង្ស័យ០១នាក់ទៀត មានឈ្មោះ ជៀប ឈុនលី(ហៅជុង) ភេទប្រុស អាយុ៣១ឆ្នាំ មុខ របរមិនពិតប្រាកដ មានទីលំនៅបច្ចុប្បន្នស្ថិតនៅភូមិព្រៃទីទុយ ឃុំយាអង្គ ស្រុកថ្ពង ខេត្តកំពង់ស្ពឺ។
ជាលទ្ធផលកម្លាំងជំនាញអាវុធហត្ថខេត្តកំពង់ស្ពឺ ចាប់យកវត្ថុតាងបានរួមមាន៖ម្សៅក្រាមសថ្លាសង្ស័យជាសារធាតុញៀន៨កញ្ចប់(ទំងន់ ២០៩.៦៤ ក្រាម), ទូរស័ព្ទចំនួន ០៣គ្រឿង,ជញ្ជីងថ្លឹងគ្រឿងញៀនចំនួន០២គ្រឿង,ដែកកេះចំនួន០២,កាបូបស្ពាយចំនួន០១,អត្តសញ្ញាណប័ណ្ណសញ្ជាតិខ្មែរ ចំនួន០១សន្លឹក,ម៉ូតូចំនួន ០១គ្រឿង,កាតគ្រីម៉ូតូចំនួន ០១សន្លឹក និងថង់ច្រកគ្រឿងញៀនមួយចំនួនផងដែរ។
បច្ចុប្បន្នជនសង្ស័យទាំងពីរនាក់ខាងលើ រួមនិងវត្ថុតាងត្រូវបានកម្លាំងជំនាញការិយាល័យប្រឆាំងគ្រឿងញៀន ក្នុងមន្ទីរស្រាវជ្រាវនិងបង្រ្កាបបទល្មើសនៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូទៅសាលាដំបូងខេត្តកំពង់ស្ពឺដើម្បីចាត់ការតាមនីតិវិធី៕
