ខេត្តសៀមរាប៖ យោងតាមពាក្យបណ្ដឹងរបស់ឈ្មោះ ឡុង ឧត្តម ភេទប្រុស អាយុ ២៩ឆ្នាំ ជនជាតិខ្មែរ សញ្ជាតិខ្មែរ ដែលជាមន្រ្តីអាជ្ញាសាលានៃអង្គភាពអាជ្ញាសាលានៅសាលាដំបូងខេត្តបន្ទាយមានជ័យ មានទីលំនៅបច្ចុប្បន្ន ភូមិកំពង់ស្វាយ ឃុំកំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានដាក់ពាក្យបណ្ដឹងទៅព្រះរាជអាជ្ញា អមសាលាដំបូងខេត្តសៀមរាប ដោយប្ដឹងបុគ្គលម្នាក់ ឈ្មោះ ឆាង យូរេត ភេទប្រុស អាយុប្រហែល ៥០ឆ្នាំ មានមុខរបរមេរដ្ឋបាលព្រៃឈើស្រុកក្រឡាញ់ ចំនួន ៣បទល្មេីសរួមមាន៖ ១. បើកបរក្នុងស្ថានភាពស្រវឹងជោគជាំ តាមបំបុកសម្លាប់រូបគាត់ ;២. ប៉ុនប៉ង់ឃាតកម្ម (ជិះរថយន្តតាមបំបុកសម្លាប់រូបគាត់ចំនួន បីលើក); និង៣. បទបំផ្លិចបំផ្លាញទ្រព្យសម្បត្តិអ្នកដទៃដោយចេតនា នៃក្រមព្រហ្មទណ្ឌនៃព្រះរាជាណាចក្រកម្ពុជា ។
យោងតាមពាក្យបណ្ដឹងរបស់ជនរងគ្រោះ បានឱ្យដឹងថាកាលវេលា ម៉ោង ២២:៣០នាទីថ្ងៃទី ១៨ ខែ កុម្ភៈ ឆ្នាំ ២០២៦ រូបគាត់(ជនរងគ្រោះ) និងដៃគូរបានធ្វើដំណើរពីខេត្តសៀមរាប ទៅខេត្តបន្ទាយមានជ័យ លុះបើកមកដល់ចំណុច ភូមិត្រពាំងច្រាំង ឃុំក្រឡាញ់ ស្រុកក្រឡាញ់ ស្រាប់តែមានរថយន្តម៉ាកលុចស៊ីច ៣០០ ពណ៌ស បើកបរដោយឈ្មោះ ឆាង យូរេត ក្នុងស្ថានភាពស្រវឹងជោគជាំ ជិះតាមបំបុករថយន្តរបស់គាត់ ចំនួនបីលើក លើកទី មួយ បុកពីក្រោយ ,លើកទីពី បើកគៀងរថយន្តគាត់ក្នុងល្បឿងយ៉ាងលឿនក្នុង ល្បឿន ១៤០ គីឡូម៉ែត្រក្នុងមួយម៉ោង ,និងលើកទីបី បុគ្គលនេះបើកឡានទៅហួសរថយន្តគាត់រួចហើយ តែបកក្រោយវិញ ដេញតាមបំបុកគាត់ថែមទៀតជាង ១០នាទីពេញផ្លូវ។
ជនរងគ្រោះ បានរៀបរាប់បន្តថា សកម្មភាពយ៉ាងសាហាវព្រៃផ្សៃនេះ បុគ្គលនេះតាមបំបុករថយន្តគាត់ដល់ទៅ បីលើក ធ្វើឱ្យគាត់មានការភិតភ័យ បើកបរ គេចយករួចជីវិត ស្ទើរពុំបាន ដោយសារគាត់មានស្មារតីរឹងមាំ ទើបរួចមានជីវិត ពីការបុកសម្លាប់ដល់ទៅ បីដង។
ដើម្បីសុវត្ថិភាព រូបគាត់(ជនរងគ្រោះ)បានបើកបរយ៉ាងលឿនណាស់ កុងទ័ររហូតដល់ ១៦០ ដើម្បីរស់រាន់មានជីវិតពីការ បុកនេះ ស្ទើរតែគ្រោះថ្នាក់ក្រឡាប់ឡាន រត់គេចពីការតាមបុកសម្លាប់របស់បុគ្គលខាងលើ។
ពេលដល់រង្វង់ស្រុកក្រឡាញ់ ខ្លួនបានបើកឡានរត់ទៅរកទីប្រជុំជនដើម្បីឱ្យគេជួយ និងបានបើកមកដល់ឱសថស្ថាន ហាក់ ប៊ុនហេង ហើយចុះពីលើរថយន្ត ស្រាប់តែបុគ្គលជនបង្ក បានចុះមកតាមគាត់ទៀត ហើយនិយាយថា ចុម!តាមបុកច្រឡំមនុស្ស។ សម្តីបុគ្គលនេះប្រមាថជីវិតរបស់ពួកគាត់ជាខ្លាំង។ យកការបុកសម្លាប់នេះជាដោះស្រាយ រឿងស្រីស្នេហ៍របស់ខ្លួនដែលឈ្លោះគ្នា (កំណត់ហេតុរបស់កងរាជអាវុធខេត្តសៀមរាប)។
បុគ្គលនេះមានសភាពស្រវឹងជោគជាំខ្លាំងណាស់ ដើរស្ទើរតែមិនរត់ តែបើកឡានតាមបំបុកលឿនខ្លាំងតែ មែនទែន។ លុះដល់វេលាម៉ោង ០២:១០នាទី ទៀបភ្លឺ រូបគាត់ជាជនរងគ្រោះ បានដាក់ពាក្យបណ្ដឹងនៅមូលដ្ឋានកងរាជអាវុធហត្ថស្រុក ក្រឡាញ់តែម្តង។ និងថ្ងៃទី១៩ ខែកុម្ភៈ ឆ្នាំ២០២៦ គាត់ក៏ដាក់ពាក្យបណ្ដឹងមួយច្បាប់ទៀតនៅបញ្ជាការដ្ឋានកងរាជអាវុធខេត្តសៀមរាប មួយច្បាប់ទៀត។ លុះនៅថ្ងៃទី ២០ ខែកុម្ភៈ ឆ្នាំ២០២៦ គាត់ក៏មកដាក់ពាក្យបណ្ដឹងនៅស្ថាប័នអយ្យការដើម្បីទាមទារយុត្តិធម៌ដែល ត្រូវបានគេតាមបំបុកសម្លាប់ដល់ទៅ បីលើក។
ជនរងគ្រោះ បានបញ្ជាក់ថា ហេតុនេះ រូបគាត់ក៏បានប្ដឹងទាមទារពីជនបង្ករួមមាន៖ ទី១. សុំឱ្យស្ថាប័យអយ្យការចាត់វិធានការផ្លូវច្បាប់ និងជួយស្វែងរកយុត្តិធម៌ដល់រូបគាត់ និងទី២. ទាមទារសំណងជំងឺចិត្ត ប្រាំម៉ឺនដុល្លាអាមេរិក ពីអំពើព្រៃផ្សៃរបស់ជនល្មើស។
គួរជម្រាបជូនថា យោងតាមប្រភពព័ត៌មានពីកន្លែងកើតហេតុ បានឱ្យដឹងថា បុគ្គលឈ្មោះ ឆាង យូរេត មានមុខងារនិងតួនាទីជាមន្រ្តីរដ្ឋបាលព្រៃស្រុកក្រឡាញ់ គឺល្បីរឿងអាស្រូវច្រើន ហើយនៅថ្ងៃកេីតហេតុ គឺលោកមេព្រៃម្នាក់ ព្រោះតែខឹងស្រីស្នេហ៍ស្មានតែឡើងជិះឡាន ជាមួយអ្នកផ្សេង ក៏បានបើកបររថយន្តក្នុងស្ថានភាពស្រវឹងដេញបុក ជនរងគ្រោះក្នុងបំណងមនុស្សឃាត លុះដល់ពេលខ្លួនឈប់រថយន្ត ទើបដឹងថាអ្នកដែលខ្លួនបើករថយន្តដេញបុកនោះ គឺជាមន្ត្រីអាជ្ញាសាលាខេត្តបន្ទាយមានជ័យ ក៏ភ័យខ្លួនឯងរហូតឡើងស្វាងស្រា ហើយនិយាយថាខ្លួនបើដេញបុកច្រឡំទៅវិញ។ ចំពោះចេតនាអាក្រក់របស់លោកមេព្រៃម្នាក់នេះ ក៏ត្រូវបានប្រជាពលរដ្ឋរស់នៅក្នុងមូលដ្ឋានស្រុកក្រឡាញ់ មើលឃើញពីចារិកអំនួតអួតអាងរបស់ខ្លួនផងដែរ។ ដូច្នេះពលរដ្ឋសំណូមពរដល់ស្ថាប័នច្បាប់ ក៏ដូចជាថ្នាក់ដឹកនាំក្រសួងដែលជាមេកើយរបស់បុគ្គល ឆាង យូរេត គួរមានវិធានការណាមួយឬក៏ផ្អាកការងាររបស់គាត់បណ្ដោះអាសន្នសិន ដេីម្បីសេីុបអង្កេត និងរកយុត្តិធម៌ជូនជនរងគ្រោះ។
ជុំវិញករណីខាងលេីនេះ អង្គភាពកាសែតនគរវត្ត និងគេហទំព័រនគរដ្រេហ្គន នៅថ្ងៃទី២៧ ខែកុម្ភៈ ឆ្នាំ២០២៦នេះ ព្យាយាមទំនាក់ទំនងទៅលោក ឆាង យូរេត មានមុខងារនិងតួនាទីជាមន្រ្តីរដ្ឋបាលព្រៃស្រុកក្រឡាញ់ ដែរ ប៉ុន្ដែមិនមានលេខទូរស័ព្ទរបស់គាត់។ ហេីយប្រសិនបើសាមីខ្លួន ចង់បកស្រាយបំភ្លឺជុំវិញករណីខាងលើនេះ អង្គភាពយេីងរង់ចាំការបំភ្លឺផងដែរ៕ដោយ៖តារា
