ខ្សែប្រយុទ្ធក្រុមជម្រើសជាតិប្រេស៊ីល និងក្លឹប Real Madrid កីឡាករ Rodrygo បានហៅថ្ងៃនេះថា “ជាថ្ងៃអាក្រក់បំផុតមួយក្នុងជីវិតខ្ញុំ” បន្ទាប់ពីគាត់ត្រូវបានបញ្ជាក់ថា នឹងអវត្តមានសម្រាប់ពេលដែលនៅសល់នៃរដូវកាល និងមិនអាចចូលរួម FIFA World Cup 2026 បាន ដោយសាររបួសជង្គង់ធ្ងន់ធ្ងរ។

 

ក្លឹបបានបញ្ជាក់ថា គាត់ “ត្រូវបានវិនិច្ឆ័យឃើញថា បាក់ខ្សែសរសៃ ACL និងបាក់ meniscus ខាងក្រៅ នៅជង្គង់ខាងស្តាំ”។ របួស ACL ជាទូទៅធ្វើឲ្យកីឡាករបាត់បង់ពេលវេលាលេងស្ទើរពេញមួយរដូវកាល ហើយពេលខ្លះអាចយូរជាងនេះទៀត។

 

Rodrygo បានចូលលេងជាកីឡាករប្តូរចូលនៅវគ្គទី២ ក្នុងការប្រកួតដែល Real ចាញ់ក្រុម Getafe CF កាលពីថ្ងៃចន្ទ ដោយគាត់ចូលលេងនៅនាទីទី 55 ហើយបញ្ចប់ការប្រកួត។ នេះជាការបង្ហាញខ្លួនលើកដំបូងរបស់គាត់ ចាប់តាំងពីការចូលជំនួសនៅដើមខែកុម្ភៈសម្រាប់ក្លឹបក្នុងលីគ La Liga។

 

Rodrygo បានសរសេរនៅលើបណ្ដាញសង្គមថា៖“មួយក្នុងចំណោមថ្ងៃអាក្រក់បំផុតក្នុងជីវិតខ្ញុំ។ ខ្ញុំតែងតែភ័យខ្លាចរបួសប្រភេទនេះ។ ប្រហែលជាជីវិតពេលនេះសាហាវចំពោះខ្ញុំបន្តិច… ប៉ុន្តែខ្ញុំក៏បានទទួលបទពិសោធន៍អស្ចារ្យជាច្រើនដែលខ្ញុំក៏មិនគិតថាសមនឹងទទួលដែរ”។

 

គាត់បានបង្ហាញខ្លួន 5 លើកសម្រាប់ប្រេស៊ីល ក្នុង 2022 FIFA World Cup នៅកាតា។

 

Rodrygo បន្ថែមថា៖“ឧបសគ្គធំមួយបានកើតឡើងក្នុងជីវិត និងអាជីពរបស់ខ្ញុំ ដែលរារាំងខ្ញុំមិនឲ្យធ្វើអ្វីដែលខ្ញុំស្រលាញ់បំផុតរយៈពេលមួយ។ ខ្ញុំមិនអាចលេងសម្រាប់ក្លិបរហូតដល់ចប់រដូវកាល ហើយក៏ខកខាន World Cup ជាមួយប្រទេសខ្ញុំផងដែរ — ក្តីសុបិន្តដែលគ្រប់គ្នាដឹងថាវាមានន័យយ៉ាងណាចំពោះខ្ញុំ។ ប៉ុន្តែខ្ញុំនឹងត្រូវតែរឹងមាំ”៕