តារាវាយកូនបាល់លេខ 1 ពិភពលោក Aryna Sabalenka បានភ្ជាប់ពាក្យជាផ្លូវការហើយ បន្ទាប់ពីដៃគូរបស់នាង Georgios Frangulis បានសុំរៀបការជាមួយនាង ដោយផ្តល់ចិញ្ចៀនពេជ្រធំមួយ ក្នុងបរិយាកាសពោរពេញដោយផ្កា និងទៀន។

តារាវាយកូនបាល់សញ្ជាតិបេឡារុស្សរូបនេះ ហាក់ដូចជាភ្ញាក់ផ្អើលយ៉ាងខ្លាំង នៅពេលគូដណ្តឹងសេដ្ឋីប្រេស៊ីលរបស់នាង លុតជង្គង់សុំរៀបការ កាលពីថ្ងៃពុធ។ នាងបានយកដៃគ្របមុខ មុនពេល Frangulis បង្ហាញចិញ្ចៀនភ្ជាប់ពាក្យដ៏អស្ចារ្យនោះ។

Sabalenka មិនអាចបញ្ឈប់ស្នាមញញឹមបានឡើយ ខណៈនាងអោប និងថើបគូដណ្តឹងរបស់នាង នៅជិតអាងហែលទឹកដែលតុបតែងដោយផ្កា និងភ្លើងទៀន។

នាងបានបង្ហោះវីដេអូលើ Instagram ជាមួយចំណងជើងថា “You & me forever” ព្រមទាំង ចិញ្ចៀន និងបេះដូងពណ៌ស។

ការប្រកាសនេះទទួលបានសារអបអរសាទរពីតារាវាយកូនបាល់ Novak Djokovic និងភរិយារបស់គាត់ Jelena Djokovic តារាហូលីវូដ Eiza Gonzalez និងកីឡាករវាយកូនបាល់បុរស Ben Shelton ផងដែរ។

មុននេះ អ្នកគាំទ្របានសន្និដ្ឋានថា Sabalenka និង Frangulis នឹងរៀបការគ្នាឆាប់ៗ ជាពិសេសបន្ទាប់ពីនាងបានផ្ញើសារផ្ទាល់ស្តីពីការរៀបការ នៅពេលប្រកួត Brisbane International កាលពីខែមករា។

Sabalenka បានបង្ហាញទំនាក់ទំនងស្នេហាជាមួយ Frangulis ជាសាធារណៈក្នុងខែឧសភា 2024 បន្ទាប់ពីនាងចាញ់ Iga Swiatek នៅព្រឹត្តិការណ៍ Italian Open។

ការបង្ហាញនេះកើតឡើងពីរខែបន្ទាប់ពីអតីតមិត្តប្រុសរបស់នាង Konstantin Koltsov បានស្លាប់ បន្ទាប់ពីធ្លាក់ពីលើរានហាលសណ្ឋាគារនៅទីក្រុង Miami ដែលធ្វើឲ្យនាងរងទុក្ខយ៉ាងខ្លាំង។

ខែកក្កដា 2024 Sabalenka បានហៅ Frangulis ថា “ជីវិតស្នេហារបស់ខ្ញុំ” ខណៈពេលពួកគេចំណាយពេលវិស្សមកាលរួមគ្នា បន្ទាប់ពីនាងដកខ្លួនចេញពី Wimbledon ដោយសាររបួស។

Frangulis កើតនៅប្រេស៊ីល ជាស្ថាបនិកម៉ាកអាហារសុខភាព Oakberry ដែលធ្លាប់ឧបត្ថម្ភក្រុម Haas F1 ហើយបានសហការជាមួយ Sabalenka បន្ទាប់ពីទំនាក់ទំនងស្នេហាចាប់ផ្តើម។ នាងក៏បានបង្កើតម៉ឺនុយ acai bowl ផ្ទាល់ខ្លួនសម្រាប់ម៉ាកនេះផងដែរ។

គាត់បានសិក្សាច្បាប់ មុនក្លាយជាអ្នកជំនួញ ហើយមានចំណាប់អារម្មណ៍ខ្លាំងលើកីឡាម៉ូតូ ដោយធ្លាប់ចូលរួមប្រណាំង 128 លើក ក្នុងព្រឹត្តិការណ៍ Porsche 911 GT3 Cup នៅប្រេស៊ីល៕