នៅក្នុងនយោបាយអន្តរជាតិ ស្ថានភាពអំណាចមិនស្មើគ្នា ប្រទេសធំៗដែលមានអំណាចសេដ្ឋកិច្ច យោធា និងឥទ្ធិពលនយោបាយ តែងតែមានសមត្ថភាពកំណត់ទិសដៅឬលទ្ធផលជាច្រើននៅលើឆាកពិភពលោក។ ក្នុងបរិបទនេះ មានអ្នកវិភាគជាច្រើនបានប្រៀបធៀបថា ប្រទេសតូចៗ គឺដូចជាមីនុយសម្រាប់ប្រទេសធំៗជ្រើសរើស មិនមែនជាមិត្តរួមតុឡើយ។ អត្ថន័យនៃការប្រៀបធៀបនេះ បង្ហាញពីភាពខ្សោយ និងភាពងាយរងឥទ្ធិពលរបស់ប្រទេសតូចៗក្នុងការប្រកួតប្រជែងអំណាចអន្តរជាតិ។

មីនុយគឺជាអ្វីដែលអ្នកអង្គុយនៅតុអាចជ្រើសរើសបានតាមចំណង់ចំណូលចិត្ត។
នៅក្នុងន័យនេះ ប្រទេសធំៗអាចជ្រើសរើសថាតើត្រូវគាំទ្រឬសម្ពាធលើប្រទេសតូចៗ តាមអត្ថប្រយោជន៍យុទ្ធសាស្ត្ររបស់ខ្លួន។ ពួកគេអាចប្រើប្រាស់ឧបាយការណ៍ផ្សេងៗ ដូចជា ការជួយសេដ្ឋកិច្ច ការវិនិយោគ ការផ្តល់ជំនួយយោធា ឬសម្ពាធនយោបាយ ដើម្បីបង្កើតឥទ្ធិពលលើការសម្រេចចិត្តរបស់ប្រទេសតូចៗ។ ដូច្នេះ ប្រទេសតូចៗជាច្រើនត្រូវបង្ខំចិត្តលេងតួនាទីតាមល្បែងអំណាចដែលប្រទេសធំៗកំណត់។

ការនិយាយថា “មិនមែនជាមិត្តរួមតុ” មានន័យថា ប្រទេសតូចៗមិនតែងតែមានសិទ្ធិស្មើគ្នាក្នុងការសម្រេចចិត្ត ឬក្នុងការកំណត់ច្បាប់នៃល្បែងអន្តរជាតិ។ ជារើយៗ ការសម្រេចចិត្តធំៗត្រូវបានធ្វើឡើងដោយប្រទេសមានអំណាច ខណៈដែលប្រទេសតូចៗត្រូវតែទទួលយកលទ្ធផលនោះ។ នេះបង្ហាញពីភាពមិនស្មើរនៅក្នុងប្រព័ន្ធអន្តរជាតិ ដែលអំណាចជាគន្លឹះសំខាន់បំផុត។

ក្នុងស្ថានភាពដែលប្រទេសតូចៗអាចក្លាយជាគោលដៅឥទ្ធិពលរបស់ប្រទេសធំៗ គោលនយោបាយរបស់ប្រទេសតូចៗគួរត្រូវបានរៀបចំយ៉ាងប្រុងប្រយ័ត្ន និងឆ្លាតវៃ ដើម្បីការពារអធិបតេយ្យភាព និងផលប្រយោជន៍ជាតិ។

លោកតាយល់ថា៖មានគោលនយោបាយសំខាន់ៗមួយចំនួនដែលប្រទេសតូចៗអាចអនុវត្តបាន

១. គោលនយោបាយតុល្យភាព (Balance Policy)
ប្រទេសតូចៗគួររក្សាទំនាក់ទំនងល្អជាមួយប្រទេសធំៗជាច្រើន មិនគួរពឹងផ្អែកលើប្រទេសណាមួយផ្តាច់មុខឡើយ  ការរក្សាតុល្យភាពនេះអាចជួយកាត់បន្ថយសម្ពាធ និងបង្កើនជម្រើសក្នុងការសម្រេចចិត្ត។

២. ការទូតឆ្លាតវៃ (Smart Diplomacy)
ការទូតមានតួនាទីសំខាន់ណាស់សម្រាប់ប្រទេសតូចៗ ត្រូវប្រើការចរចា ការសហការ និងការបង្កើតភាពជាមិត្តភាពជាមួយប្រទេសផ្សេងៗ ដើម្បីរក្សាសន្តិភាព និងការពារផលប្រយោជន៍ជាតិ។

៣. ពង្រឹងសេដ្ឋកិច្ចជាតិ
សេដ្ឋកិច្ចរឹងមាំធ្វើឱ្យប្រទេសមានឯករាជ្យក្នុងការសម្រេចចិត្ត។
ប្រទេសតូចៗគួរលើកកម្ពស់ការវិនិយោគ ការអប់រំ បច្ចេកវិទ្យា និងផលិតភាព ដើម្បីបង្កើនសមត្ថភាពប្រកួតប្រជែង។

៤. ការចូលរួមក្នុងអង្គការអន្តរជាតិ
ការចូលរួមក្នុងអង្គការអន្តរជាតិ និងតំបន់ អាចជួយឲ្យប្រទេសតូចៗមានសម្លេងនៅលើឆាកពិភពលោក និងទទួលបានការគាំទ្រពីសហគមន៍អន្តរជាតិ។

៥. ពង្រឹងសមត្ថភាពការពារជាតិ
ទោះជាប្រទេសតូចក៏ដោយ ការមានកម្លាំងការពារជាតិគ្រប់គ្រាន់ និងមានស្ថាប័នរឹងមាំ អាចជួយការពារអធិបតេយ្យភាព និងទប់ស្កាត់ការជ្រៀតជ្រែកពីក្រៅ។

ដូច្នេះ ប្រទេសតូចៗមិនអាចផ្លាស់ប្តូរទំហំភូមិសាស្ត្រ ឬអំណាចរបស់ខ្លួនបានភ្លាមៗទេ ប៉ុន្តែអាចផ្លាស់ប្តូរយុទ្ធសាស្ត្ររបស់ខ្លួនបាន។ ដោយការទូតឆ្លាតវៃ ការរក្សាតុល្យភាពអំណាច និងការពង្រឹងសេដ្ឋកិច្ចជាតិ ប្រទេសតូចៗអាចការពារផលប្រយោជន៍ខ្លួន និងបង្កើនតួនាទីរបស់ខ្លួននៅលើឆាកអន្តរជាតិ៕

ដោយ៖ លោកតា