កូរ៉េខាងត្បូងនិយាយថា កូរ៉េខាងជើងបានបាញ់មីស៊ីលផ្លោងប្រហែល ១០ គ្រាប់ចូលទៅក្នុងសមុទ្រភាគខាងកើតនៃឧបទ្វីប។

យោធាកូរ៉េខាងត្បូងបានរកឃើញមីស៊ីលផ្លោងប្រហែល ១០ គ្រាប់ដែលបានបាញ់ចេញពីតំបន់ Sunan ក្នុងប្រទេសកូរ៉េខាងជើងចូលទៅក្នុងសមុទ្រជប៉ុននៅម៉ោង ១:២០ រសៀល នេះបើយោងតាមការលើកឡើងរបស់អគ្គសេនាធិការចម្រុះ (JCS) នៅថ្ងៃនេះ។
ទីភ្នាក់ងារនេះបានបន្ថែមថា “យោធាកូរ៉េខាងត្បូងរក្សាស្ថានភាពត្រៀមខ្លួនជាស្រេច និងចែករំលែកព័ត៌មានជាបន្តបន្ទាប់អំពីមីស៊ីលផ្លោងរបស់កូរ៉េខាងជើងជាមួយសហរដ្ឋអាមេរិក និងជប៉ុន ដើម្បីបង្កើនការត្រួតពិនិត្យ”។
NHK ដកស្រង់ប្រភពពីក្រសួងការពារជាតិជប៉ុន បាននិយាយថា មីស៊ីលបានធ្លាក់ចូលទៅក្នុងសមុទ្រ នៅខាងក្រៅតំបន់សេដ្ឋកិច្ចផ្តាច់មុខរបស់ជប៉ុន។ នេះគឺជាលើកទីបីហើយដែលកូរ៉េខាងជើងបានបាញ់មីស៊ីលផ្លោងនៅឆ្នាំនេះ។ ការបាញ់បង្ហោះនេះបានកើតឡើងនៅផ្ទៃខាងក្រោយនៃសហរដ្ឋអាមេរិក និងកូរ៉េខាងត្បូងដែលបានចាប់ផ្តើមសមយុទ្ធយោធានិទាឃរដូវ ដែលមានរហស្សនាមថា “ខែលសេរីភាព” នៅថ្ងៃទី ៩ ខែមីនា ដែលនឹងមានរយៈពេលរហូតដល់ថ្ងៃទី ១៩ ខែមីនា និងមានទាហានប្រហែល ១៨.០០០ នាក់ចូលរួម។ សមយុទ្ធនេះត្រូវបានកូរ៉េខាងជើងរិះគន់ជាញឹកញាប់ថាជា “ការក្លែងបន្លំការឈ្លានពាន”។
លោកស្រី Kim Yo-jong ដែលជាប្អូនស្រីរបស់មេដឹកនាំកូរ៉េខាងជើង លោក Kim Jong-un បានព្រមាននៅថ្ងៃទី 10 ខែមីនាថា សមយុទ្ធរវាងសហរដ្ឋអាមេរិក និងកូរ៉េខាងត្បូង «អាចបង្កឱ្យមានផលវិបាកដែលមិនអាចនឹកស្មានដល់ និងគួរឱ្យរន្ធត់» នេះបើយោងតាមទីភ្នាក់ងារសារព័ត៌មានរដ្ឋកូរ៉េខាងជើង KCNA។

ថ្មីៗនេះ កូរ៉េខាងជើងតែងតែបង្ហាញសមត្ថភាពយោធារបស់ខ្លួន ដោយលោក Kim Jong-un បានប្រកាសថា ប្រទេសនេះនឹងផ្តោតលើគម្រោងដើម្បីបង្កើនឃ្លាំងអាវុធនុយក្លេអ៊ែររបស់ខ្លួន។ ការបាញ់មីស៊ីលផ្លោងថ្មីបំផុតគឺនៅថ្ងៃទី 27 ខែមករា ដែលជាចលនាមួយដែលទីក្រុងព្យុងយ៉ាងបានប្រកាសថា គឺដើម្បីសាកល្បងប្រព័ន្ធបាញ់រ៉ុក្កែតច្រើនគ្រាប់ដែលមានសមត្ថភាពធំជាងមុន៕

រូប​ថត​: KCNA