Georgina Rodriguez ដែលជាគូដណ្តឹងរបស់កំពូលតារាបាល់ទាត់ព័រទុយហ្គាល់ Cristiano Ronaldo ត្រូវបានគេរាយការណ៍ថាបានត្រលប់ទៅប្រទេសអេស្ប៉ាញវិញជាមួយនឹងកូនៗរបស់នាងដោយចាកចេញពីប្រទេសអារ៉ាប៊ីសាអូឌីតចំពេលមានជម្លោះកាន់តែខ្លាំងឡើងនៅមជ្ឈឹមបូព៌ា។

 

យោងតាមសារព័ត៌មាន Hola តារាម៉ូដែល និងជាអ្នកមានឥទ្ធិពលលើបណ្តាញសង្គមជនជាតិអេស្ប៉ាញនេះបានចាកចេញពីទីក្រុង Riyadh តាមរយៈយន្តហោះឯកជន។ ខណៈពេលដែលវានៅតែមិនច្បាស់ថាតើនេះជាការធ្វើដំណើរខ្លី ឬការផ្លាស់ប្តូរទីលំនៅរយៈពេលវែង ដើម្បីជៀសវាងភាពតានតឹងដែលកំពុងកើនឡើងនៅមជ្ឈឹមបូព៌ានោះ Rodriguez ហាក់ដូចជាកំពុងផ្តល់អាទិភាពដល់សុវត្ថិភាពគ្រួសាររបស់នាង។

 

នាងបានរស់នៅក្នុងទីក្រុង Riyadh ជាមួយ Ronaldo និងកូនរបស់ពួកគេចាប់តាំងពីខ្សែប្រយុទ្ធវ័យ 41 ឆ្នាំរូបនេះបានចុះហត្ថលេខាលើកិច្ចសន្យាដ៏ធំមួយជាមួយ Al Nassr នៅដើមឆ្នាំ 2023 ។

 

ថ្មីៗនេះ Rodriguez បានទៅទស្សនាជ្រលងភ្នំប្រវត្តិសាស្ត្រ Cuelgamuros ដែលពីមុនត្រូវបានគេស្គាល់ថាជា Valley of the Fallen ក្នុងទីក្រុងម៉ាឌ្រីដ ជាកន្លែងដែលនាងបានចូលរួមពិធីសាសនាកាតូលិកជាមួយកូនៗរបស់នាង។

 

តារាវ័យ 32 ឆ្នាំរូបនេះបានចែករំលែករូបថត និងវីដេអូជាច្រើនជាមួយអ្នកតាមដានរាប់លាននាក់របស់នាងកាលពីថ្ងៃទី 10 ខែមីនា ដោយចាប់យកបរិយាកាសដ៏ឧឡារិកនៅខាងក្នុង Basilica ។ នៅក្នុងរូបថតមួយ កូនស្រីពៅរបស់នាងឈ្មោះ Bella Esmeralda ត្រូវបានគេឃើញចូលព្រះវិហារជាមួយបងប្អូនបង្កើតរបស់នាងគឺ Mateo និង Alana Martina ។

 

ការផ្លាស់ទីលំនៅរបស់គ្រួសារនេះជាលើកដំបូងបានបង្កឱ្យមានការរំពឹងទុកនៅពេលដែលយន្តហោះឯកជន Bombardier Global Express 6500 របស់ Ronaldo ដែលមានតម្លៃប្រហែល 81 លានដុល្លារបានចាកចេញពីទីក្រុង Riyadh ទៅកាន់ទីក្រុង Madrid កាលពីថ្ងៃទី 2 ខែមីនា។

 

បន្ទាប់ពីមានពាក្យចចាមអារ៉ាមដំបូងថាតារាឆ្នើមព័រទុយហ្គាល់បានចាកចេញពីមជ្ឈិមបូព៌ាដើម្បីសុវត្ថិភាពផ្ទាល់ខ្លួន Al Nassr បានបញ្ជាក់ភ្លាមៗថាប្រធានក្រុមរបស់ពួកគេនៅតែស្ថិតក្នុងប្រទេសអារ៉ាប៊ីសាអូឌីតជាមួយមិត្តរួមក្រុមរបស់គាត់។

 

ទោះជាយ៉ាងណាក៏ដោយ គ្រូបង្វឹកក្រុម Al Nassr លោក Jorge Jesus ថ្មីៗនេះ បានបញ្ជាក់ថា Ronaldo បានរងរបួសសរសៃពួរអំឡុងពេលប្រកួតថ្មីៗនេះ ដែលមានលក្ខណៈធ្ងន់ធ្ងរជាងការរំពឹងទុកដំបូង ហើយខ្សែប្រយុទ្ធត្រូវធ្វើដំណើរត្រឡប់ទៅប្រទេសអេស្ប៉ាញវិញ ដើម្បីព្យាបាល ឱ្យជាសះស្បើយឡើងវិញនៅថ្ងៃទី 6 ខែមីនា៕