ភ្នំពេញ៖ ទីបំផុតករណីអង្គភាពប្រឆាំងអំពើពុករលួយ (ACU) បានបង្ហាញព័ត៌មានលម្អិត នៃប្រតិបត្តិការស្រាវជ្រាវ រហូតឈានដល់ការចាប់ខ្លួនអនុប្រធានសាខាគយ និងរដ្ឋាករខេត្តកោះកុង និងបក្ខពួក ដោយរកឃើញលុយពុករលួយជាង១លានដុល្លារ។

 

ចំពោះប្រតិបត្តិការស្រាវជ្រាវ និងបង្ក្រាបបទល្មើសពុករលួយនេះ ប្រធានស្តីទី ACU បណ្ឌិត យ៉ិនទៀង ពុទ្ធិរិទ្ធ ដឹកនាំការងារសំយោគករណី ម៉ៅ សានសូនា ចំណែកឯឧបការី ACU លោក យ៉ិនទៀង ពុទ្ធិរ៉ា ជាអ្នកដឹកនាំផ្ទាល់ក្រុមការងារស៊ើបអង្កេតជាង ១០ ក្រុម លើករណី ម៉ៅ សាន់សូនា និងស្តាប់ចម្លើយជនសង្ស័យ។

 

សូមជម្រាបជូនថា ACU បានចាប់ឃាត់អនុប្រធាន និងមន្រ្តីសាខាគយ និងរដ្ឋាករខេត្តកោះកុង ព្រមទាំងមនុស្ស២នាក់ទៀត បញ្ជូនទៅតុលាការ ដែលល្បីល្បាញ ចាប់ឡានដឹកទំនិញមិនរើស តាំងពីទំនិញមានពន្ធ ទំនិញគ្មានពន្ធ គ្រឿងអេតចាយ ត្រី សាច់ បន្លែ គ្រឿងផ្ទះដែលរុះរើ…នៅកន្លែងឈរជើងរបស់ពួកគេចំណុចអណ្តូងទឹក។

 

សម្រាប់ជនសង្ស័យទាំងនេះ ត្រូវបាន ACU បញ្ជូនទៅកាន់តុលាការកាលពីថ្ងៃទី១៨ ខែមីនា ឆ្នាំ២០២៦មកម្ល៉េះ តែទើបទម្លាយចេញ នៅក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) លើកទី៨ អាណត្តិទី៤ នាថ្ងៃទី២៥ ខែមីនា ឆ្នាំ២០២៦នេះ។

 

បើយោងតាមរបាយការណ៍របស់លោក យ៉ិនទៀង ពុទ្ធិរិទ្ធ អនុប្រធានទី១ ACU បានបញ្ជាក់ថា ជនសង្ស័យ ៤រូបរួមមាន៖

ទី១៖ ឈ្មោះ ម៉ៅ សាន់សូនា ភេទប្រុស អាយុ ៥៨ឆ្នាំ មុខរបរ អនុប្រធានសាខាគយ និងរដ្ឋាករ ខេត្តកោះកុង ជាប់សង្ស័យក្នុងអំពើរំលោភអំណាច និងសម្អាតប្រាក់

ទី២៖ ឈ្មោះ ម៉ៅ ទិត្យា ភេទប្រុស អាយុ ៥៤ឆ្នាំ មុខរបរ បុគ្គលិកជាប់កិច្ចសន្យា នៃសាខាគយ និងរដ្ឋាករ ខេត្តកោះកុង ជាប់សង្ស័យពីបទ សមគំនិតក្នុងអំពើរំលោភអំណាច និងសម្អាតប្រាក់

ទី៣៖ ឈ្មោះ ពត ស្រីនាង ភេទស្រី អាយុ ៣២ឆ្នាំ មុខរបរមេផ្ទះ ជាប់សង្ស័យពីបទ សមគំនិតក្នុងការសម្អាតប្រាក់

ទី៤៖ ឈ្មោះ ផល ដុល្លា ភេទ ប្រុស អាយុ២៧ឆ្នាំ មុខរបរបុគ្គលិកធនាគារ ជាប់សង្ស័យពីបទ សមគំនិតក្នុងការសម្អាតប្រាក់៕ដោយ៖តារា

 

សូមអានរបាយការណ៍អង្គភាពប្រឆាំងអំពើពុករលួយ (ACU) បានបង្ហាញព័ត៌មានលម្អិត នៃប្រតិបត្តិការឃាត់ខ្លួនមន្រ្តីគយទាំងនោះ មានដូចខាងក្រោម៖