ប្រទេស និងអង្គការអន្តរជាតិជាច្រើនបានស្វាគមន៍បទឈប់បាញ់រយៈពេល ១០ ថ្ងៃរវាងអ៊ីស្រាអែល និងលីបង់។

មុននេះបន្តិច ប្រធានាធិបតីអាមេរិក ដូណាល់ ត្រាំ បាននិយាយថា ប្រទេសលីបង់ និងអ៊ីស្រាអែលបានយល់ព្រមលើបទឈប់បាញ់រយៈពេល ១០ ថ្ងៃ បន្ទាប់ពីការចរចារយៈពេលមួយសប្តាហ៍ដែលសម្របសម្រួលដោយទីក្រុងវ៉ាស៊ីនតោន។
ដោយសរសេរនៅលើវេទិកាប្រព័ន្ធផ្សព្វផ្សាយសង្គម Truth Social លោក ត្រាំ បាននិយាយថា បទឈប់បាញ់នៅក្នុងប្រទេសលីបង់នឹងចាប់ផ្តើមនៅម៉ោង ៥:១៦ ល្ងាច ម៉ោងភាគខាងកើត (ម៉ោង ៤:០០ ព្រឹក ថ្ងៃទី ១៧ ខែមេសា ម៉ោងនៅប្រទេសកម្ពុជា) ដើម្បីបញ្ចប់ជម្លោះរវាងអ៊ីស្រាអែល និងកងកម្លាំងហេសបូឡា។
អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស បានស្វាគមន៍កិច្ចព្រមព្រៀងបទឈប់បាញ់ ដោយសម្តែងក្តីសង្ឃឹមថា បទឈប់បាញ់នេះនឹងក្លាយជាមូលដ្ឋានគ្រឹះសម្រាប់ស្ថិរភាពរយៈពេលវែងនៅមជ្ឈិមបូព៌ា។
លោក ហ្គូតេរ៉េស បានសរសេរនៅលើប្រព័ន្ធផ្សព្វផ្សាយសង្គមថា “ខ្ញុំសង្ឃឹមថា នេះនឹងបើកផ្លូវសម្រាប់ការចរចាឆ្ពោះទៅរកដំណោះស្រាយរយៈពេលវែងចំពោះជម្លោះ និងរួមចំណែកដល់កិច្ចខិតខំប្រឹងប្រែងជាបន្តបន្ទាប់ ដើម្បីសម្រេចបាននូវសន្តិភាពយូរអង្វែង និងទូលំទូលាយនៅក្នុងតំបន់”។
លោក Guterres បានបន្ថែមថា “ខ្ញុំសូមអំពាវនាវដល់គ្រប់ភាគីទាំងអស់ឱ្យគោរពបទឈប់បាញ់យ៉ាងពេញលេញ និងគោរពច្បាប់អន្តរជាតិគ្រប់ពេលវេលា”។ ក្រសួងការបរទេសកាតាបានស្វាគមន៍ “ការប្រកាសបទឈប់បាញ់នៅលីបង់ ហើយចាត់ទុកថាវាជាជំហានដំបូងឆ្ពោះទៅរកការបន្ធូរបន្ថយភាពតានតឹង”។
ក្រសួងបានបញ្ជាក់ថា ការប្រកាន់ខ្ជាប់នូវលក្ខខណ្ឌនៃបទឈប់បាញ់គឺ “ចាំបាច់” ដើម្បីធានាបាន “ការបន្ធូរបន្ថយភាពតានតឹង និងការពារការពង្រីកតំបន់តានតឹង”។
សេចក្តីថ្លែងការណ៍នេះក៏បាននិយាយផងដែរថា កាតាបានកោតសរសើរចំពោះ “កិច្ចខិតខំប្រឹងប្រែងរបស់ប្រធានាធិបតី Trump ក្នុងការសម្របសម្រួល និងចូលរួមចំណែកដល់បទឈប់បាញ់”។
ក្រសួងការបរទេសអ៊ីរ៉ង់ក៏បានស្វាគមន៍បទឈប់បាញ់រវាងអ៊ីស្រាអែល និងលីបង់ផងដែរ។ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បាននិយាយថា កិច្ចព្រមព្រៀងនេះត្រូវបានភ្ជាប់ទៅនឹងកិច្ចព្រមព្រៀងបទឈប់បាញ់រយៈពេលពីរសប្តាហ៍រវាងទីក្រុងតេអេរ៉ង់ និងទីក្រុងវ៉ាស៊ីនតោន ដែលសម្របសម្រួលដោយប៉ាគីស្ថាន។
លោក Baghaei បាននិយាយថា “[អ៊ីរ៉ង់ស្វាគមន៍] ការប្រកាសបទឈប់បាញ់នៅលីបង់ ហើយចាត់ទុកថាការបញ្ចប់សង្គ្រាមនៅលីបង់ជាផ្នែកមួយនៃកិច្ចព្រមព្រៀងបទឈប់បាញ់រវាងអ៊ីរ៉ង់ និងសហរដ្ឋអាមេរិក ដែលសម្របសម្រួលដោយប៉ាគីស្ថាន”។
ប្រធានក្រុមប្រឹក្សាអឺរ៉ុប លោក Antonio Costa បានមានប្រសាសន៍ថា បទឈប់បាញ់រយៈពេល ១០ ថ្ងៃរវាងអ៊ីស្រាអែល និងលីបង់ គឺជា “ដំណឹងដ៏អស្ចារ្យ” ហើយ “ឥឡូវនេះត្រូវតែអនុវត្ត និងផ្ទៀងផ្ទាត់នៅនឹងកន្លែង”៕

រូប​ថត​: AFP