ខ្សែប្រយុទ្ធ Erling Haaland របស់ក្លឹប Manchester City បាននិយាយថាការប្រកួតក្របខណ្ឌអង់គ្លេស Premier League បន្ទាប់របស់ពួកគេជាមួយនឹងក្រុម Burnley គឺដូចជាការប្រកួតវគ្គផ្តាច់ព្រ័ត្របន្ទាប់ពីជ័យជម្នះ 2-1 កាលពីថ្ងៃអាទិត្យលើក្រុមនាំមុខ Arsenal បានផ្តល់ឱ្យពួកគេនូវឱកាសដើម្បីឡើងទៅកាន់កំពូលតារាប្រសិនបើទទួលបានជ័យជម្នះនៅពាក់កណ្តាលសប្តាហ៍នេះទៀត។

 

Arsenal បានឡើងឈរកំពូលតារាងតាំងពីខែតុលា ប៉ុន្តែ City ដែលមានមួយប្រកួតក្នុងដៃ បានកាត់បន្ថយគម្លាតមកត្រឹមបីពិន្ទុជាមួយនឹងការឈ្នះនៅកីឡដ្ឋាន Etihadរបស់ខ្លួន។

 

ជ័យជម្នះមួយទៀតនៅថ្ងៃពុធនឹងធ្វើឱ្យក្រុមរបស់លោក Pep Guardiola ទទួលបានពិន្ទុស្មើជាមួយក្លឹបនៅទីក្រុងឡុងដ៍ ហើយពួកគេអាចឈរនៅលើកំពូលតារាងលើគ្រាប់បាល់ស៊ុតបញ្ចូលទី ឬភាពខុសគ្នានៃគ្រាប់បាល់ អាស្រ័យលើទំហំនៃជ័យជម្នះ។

 

ខ្សែប្រយុទ្ធ Haaland ដែលបានស៊ុតបាល់បញ្ចូលទីក្នុងជ័យជម្នះកាលពីថ្ងៃអាទិត្យបានប្រាប់សារព័ត៌មាន Sky ⁠Sports ថា “នៅថ្ងៃពុធ ពួកយើងមានការប្រកួតវគ្គផ្តាច់ព្រ័ត្រ។ ការប្រកួត Burnley មានសារៈសំខាន់ដូចវគ្គផ្តាច់ព្រ័ត្រ ។យើងត្រូវតែផ្តោតលើវា”។

 

Arsenal ដែលកំពុងព្យាយាមដណ្តើមពាន Premier ⁠League ជាលើកដំបូងរបស់ពួកគេចាប់តាំងពីឆ្នាំ 2004 នឹងត្រូវប្រកួតបន្ទាប់ ជាមួយNewcastle United នៅថ្ងៃសៅរ៍៕